Хэн нэгний тухай хүүрнэх, ярилцах явцдаа сэтгэлзүйн онцлог, ажлын амжилтаар нь бахархах, зарим үед баяр, гунигийн нулимс унагах гээд зочин, зочны онцлог байдаг. Энэ удаагийн албандаа 23 дахь жилдээ үүрэг гүйцэтгэж байгаа, 2022 онд “Онцгой гавьяа” байгуулсан Онцгой байдлын байгууллагын алба хаагчдын нэг болох ахлах ахлагч Р.Энхтүвшин. Тэрбээр Дархан-Уул аймгийн Онцгой байдлын газрын Гал түймэр унтраах, аврах 22 дугаар ангийн салааны захирагчийн туслахаар ажиллаж байна.
-Албаараа бахархах хамгийн том шалтгаан нь аврагч та бүхний байгуулсан гавьяа. Хүнд гээд хойш суулгүй болгоно гээд зүтгэж байгаа сэтгэлийг хүртэл хайрламаар тийм л сайхан…?
Арван жилийн сургуулиа төгсөөд л 18 настай залуу анх Онцгой байдлын албанд үүрэг гүйцэтгэж эхэлж байлаа. 1997 он буюу 23 жилийн өмнө. Тухайн үед Цагдаагийн байгууллагын харьяанд Гал команд нэртэй байсан. Ажиллах хугацаандаа гал түймрийн 720 удаагийн, аюулт үзэгдэл, ослын 85 удаагийн дуудлагаар үүрэг гүйцэтгэсэн байна. Нийт 18 иргэний амь насыг авран хамгаалж, аж, ахуй нэгж байгууллага, иргэдэд учирч болох байсан 2,8 тэрбум төгрөгийн өмч хөрөнгө, эд зүйлсийг авран хамгаалсан. Үгээр илэрхийлэх боломжгүй тийм л баяр бахдал, бахархлыг ажил, алба маань олгодог учраас хоёргүй сэтгэлээр үүргээ гүйцэтгэдэг. Миний сонгосон зам болохоор аль болох шулуун байлгахыг л хүснэ шүү дээ. Шантрах, ухрах зориггүй больчихдог юм билээ.
-Цаг хугацааны эргэлтээр бидний амьдрал өөрчлөгддөг. Ажил, мэргэжлийн туршлага нэмэгдэнэ. Алдаа гаргах нь багасаж, онох нь илүү байгааг анзаардаг л даа?
Залуу байхдаа аливаа зүйлийг хийж үзээд алдаа гаргахаас айх хэрэггүй л гэж боддог. Хүний амьдралд гай болох, хэн нэгэнд хохирол учруулахгүй л байвал. Сайн, сайхан зүйлийг бодож, мөрөөдөж, хөдөлмөрлөж байгаа үед бүх зүйл бүтдэг юм байна. Өнгөрсөн 2022 онд Онцгой байдлын байгууллагын “Онцгой гавьяа” байгуулсан таван албан хаагчийн нэгээр шалгарсан. Хөдөлмөр, зүтгэлийг минь үнэлсэнд баяртай байгаа. Чин сэтгэл, зүтгэл бол амжилтыг бүтээх хамгийн том шалгуур юм байна.
-Таны ур чадварыг илтгэдэг бас нэг зүйл нь аврагчдын “бага олимп” гэж нэрлэж болох Гал унтраах техникийн олон төрөлтийн спортын амжилт, тийм үү.?
Анх ажилд орж байхад үед тухайн үеийн удирдлага хурандаа Ш.Лхагвасүрэн асан “Гал унтраах техникийн олон төрөлт спортоор хичээллэх хэрэгтэй. Аврагч хүнд байх ёстой тэсвэр хатуужил, ур чадварыг өгдөг” гэж зөвлөсөн. Энэ дагуу 1997-2006 он хүртэл 9 жил хичээллэсэн байна. Хичээллэж эхэлсэн анхны жилдээ Дархан-Уул аймагт зохион байгуулагдсан бүсийн аварга шалгаруулах тэмцээнээс 4х100 метрийн төрлөөс хүрэл медаль хүртэж байлаа. Түүнээс хойш 1999 онд Булган аймагт болсон бүсийн аварга шалгаруулах тэмцээний байлдааны тархалтын төрлөөс алт, 2001 онд Сэлэнгэ аймагт болсон бүсийн аварга шалгаруулах тэмцээний саадтай 100 метрийн төрөл болон 4х100 метрээс тус бүрт мөнгө, хоёр төрөлтийн нийлбэрээр хүрэл, 2003 онд Хөвсгөл аймагт зохион байгуулагдсан бүсийн аварга шалгаруулах тэмцээний 4х100 метрийн төрлөөс хүрэл, 2003 онд болсон Хөвсгөл аймгийн бүсийн аварга шалгаруулах тэмцээний гурав сунадаг шатны төрөлд 13:08 амжилтаар мөнгөн медалийг хүртсэн. Мөн 2004 оны улсын аварга шалгаруулах тэмцээний гурав сунадаг шатны төрөлд тус ангийн гал сөнөөгч, ахлах ахлагч Э.Эрдэнэбатын хамтаар 12:62 секундын амжилт үзүүлж, Монгол Улсын рекордыг шинэчлэн, спортын мастер цол хүртэж байлаа. Энэ рекорд одоог хүртэл эвдэгдээгүй байгаа. Чөлөөт цагаараа сагс, гар бөмбөг тоглох дуртай.
-Байгууллагын хэмжээнд хийгдэж байгаа бүтээн байгуулалт, тохижилтын ажилд манлайлан оролцдог гарын ур дүйтэй алба хаагчдын нэг гэж таныг хамт олон нь тодотгодог юм байна?
1997 онд албанд орохоосоо өмнө Мэргэжил сургалт үйлдвэрлэлийн төвийн мужааны ангийг IV зэрэгтэй төгссөн. Багын гарт тааралдсан жижиг материалын эвийг нь олоод, хэлбэр, дүрс оруулаад л бүтээл хийдэг байлаа. Жил ирэх бүр л ур чадвараа сайжруулаад хамт олныхоо санаачилсан бүтээн байгуулалт, тохижилтын ажилд гар бие оролцдог. Хамгийн сүүлд гэхэд албаныхаа музейг шинэчилж, сургалт танхим болоод ангийн тохижилтын бүхий л ажлыг хийсэн.
-Албаныхаа үнэ цэнийг мэддэг, мэдэрдэг учраас өөрийгөө бүрэн дайчилж ажилладаг юм шиг санагддаг?
Тийм шүү. Дуудлагаар үүрэг гүйцэтгээд ядарсан ч гэсэн иргэдийн баяр, талархлын үг урам зориг, итгэл, найдварыг бэлэглэдэг. Ажлын маань сайхан нь шүү дээ. Тухайлбал, 2021 оны дөрөвдүгээр сарын 14-нд ээлжинд гарч байхад орон сууцны таван давхрын цонхоор бага насны хүүхэд унах гэж байна гэсэн дуудлагаар ажиллаад 4 настай охины амь насыг аварч, аав, ээжинд хүлээлгэсэн өгсөн. Аав, ээжийнх нь баярласан сэтгэлийн үг одоо хүртэл “сонсогдож” байна.
-Хувь хүн талаасаа тусч, хичээнгүй, бусдыг хайрлахад сургадаг байх, манай алба?
Тийм шүү. Өөрийнхөө оронд хүнийг тавьж, хэнд, хаана тусламж хэрэгтэй байна туслахыг боддог. Миний хувьд эхээс тавуулаа. Айлын гуравдахь хүү. Аав, ээж хоёр маань Хөвсгөл аймгийн уугуул. Аав Т.Рэгдорж Дархан хотод анх 1976 онд нүүж ирээд хуучнаар байшин үйлдвэрлэх кабинатад, ээж Т.Өлзийжаргал нь худалдааны байгууллагад ажиллаж байгаад өндөр настны тэтгэвэртээ гарцгаасан. Эхнэр, хоёр хүүхдийн хамт амьдардаг. Эхнэр Б.Мөнхцэцэг Дархан-Уул аймаг дахь аутизмын холбоог үүсгэн байгуулж, ажиллуулж байна. Хүү Э.Эрмүүн “Оюуны ирээдүй цогцолбор сургууль”-ийн есдүгээр ангид сурдаг. Охин Э.Энэрэл 5 настай. 7 дугаар цэцэрлэгт суралцдаг. Охин маань аутизмын хүрээний эмгэгтэй. Охиноо ирээдүйд бие даах чадвартай болгож өсгөх том зорилготой байна. Намайг төрүүлж өсгөсөн аав, ээждээ болон ар гэрийнхээ ажлыг бүгдийн амжуулдаг эхнэртээ баярлалаа гэж хэлмээр байна.
-Баярлалаа танд. Таны хэлснээр сайхан зүйл бодож явахад биелэх нь цаг хугацааны л асуудал байх гэж ойлгож байна?
– Үе, үеийн ах нараасаа үлгэр дуурайлал авч, сурч ирсэн. Энэ зарчмаараа залуу үеийн төлөөлөл, залуусаа сургаж, дадлагажуулж байна. Бүх зүйлд сэтгэлээрээ хандаж байгаарай гэж хэлэх дуртай. Бас бүх зүйл цаг хугацаатай. Өнөөдөр биш ч маргааш, маргааш биш ч нөгөөдөр аль нэгэнд амжилт заавал ирдэг байна. Мөр зэрэгцэн үүрэг гүйцэтгэж байгаа Дархан-Уул аймгийн Онцгой байдлын газар, Гал түймэр унтраах, аврах 22 дугаар ангийн удирдлага, алба хаагчдадаа хамгийн сайн сайхан бүхнийг хүсье. Амжилт бүрийн минь ард байдагт үргэлж талархдаг шүү гэж хэлмээр байна.
Эх сурвалж: Онцгой мэдээ сонин
