УИХ-ын чуулганы нэгдсэн хуралдаанаар УИХ-ын гишүүн С.Цэнгүүний санаачилсан хуулийг эцэслэн баталлаа. Ингэснээр 1991 онд батлагдсан “БНМАУ-ын Засгийн газарт эрх олгох тухай хууль”-ийг хүчингүй болгож, төрөөс аж ахуйн нэгжүүдэд онцгой дэглэм тогтоох эрх зүйн зохицуулалтыг өнөөгийн Үндсэн хууль, зах зээлийн тогтолцоонд нийцүүлэн шинэчилж байгаа юм.

Хууль батлагдсанаар стратегийн ач холбогдол бүхий уул уурхай, дэд бүтэц болон төрийн оролцоотой компаниудад онцгой дэглэм тогтоохтой холбоотой өмнөх эрх зүйн тодорхойгүй байдал арилна гэж үзэж байна. Мөн компанийн засаглал, хөдөлмөрийн харилцаа, өмчийн эрхэд төрийн шууд оролцоо давамгайлах эрсдэлийг бууруулах, шүүх болон бусад хяналтын байгууллагын үйл ажиллагааг илүү бие даасан байдлаар хэрэгжүүлэх нөхцөл бүрдэнэ гэж хууль санаачлагчид тайлбарлажээ.

УИХ-ын гишүүн С.Цэнгүүн: Энэхүү өөрчлөлт нь хувийн өмчийн халдашгүй байдлыг хамгаалах, гадаад болон дотоодын хөрөнгө оруулалтын орчныг тогтвортой болгох, мөн бизнес эрхлэгчдийн дунд үүссэн эрх зүйн тодорхойгүй байдлыг бууруулах зорилготойг онцолсон байна. Түүний хэлснээр, өмнөх зохицуулалтыг өнөөгийн эдийн засгийн нөхцөл байдалд тулгуурлан үргэлжлүүлэн хэрэглэх нь эрх зүйн зөрчил, давхардал үүсгэх эрсдэлтэй байсан аж.

Мөн хууль хэрэгжиж эхэлснээр төрийн өмчит компаниудын удирдлагын шийдвэр гаргалт илүү ил тод, хариуцлагатай болох, зах зээлийн зарчимд тулгуурласан засаглал бэхжих боломж бүрдэнэ гэж үзэж байна.