Улсын гарьд М.Бадарчийн барилдах эрхтэй холбоотой асуудал 2023 оны Үндэсний их баяр наадмаас хойш үргэлжилж байна. Тухайн жилийн наадамд түрүүлж улсын арслан цол хүртсэн тэрбээр допингийн шинжилгээнд бүдэрснээр цол, амжилтаа хураалгаж, дөрвөн жилээр барилдах эрхээ хасуулсан. Харин ойрын өдрүүдэд түүнийг Барилгын салбар үүсэж хөгжсөний 100 жилийн ойд барилдуулах эсэхтэй холбоотой шинэ маргаан үүслээ.

2023.07.12 — Улсын наадамд түрүүлэв

М.Бадарч 2023 оны Үндэсний их баяр наадамд ес даван түрүүлж, улсын арслан цол хүртсэн. Гэвч наадмын дараах допингийн шинжилгээгээр түүний сорьцоос Дэлхийн допингийн эсрэг агентлагийн хориглосон жагсаалтад багтдаг бодис илэрсэн талаар холбогдох байгууллагууд мэдээлсэн.

2023.09.27 — Барилдах эрхийг дөрвөн жилээр хасав

Үндэсний их баяр наадмыг зохион байгуулах хороо М.Бадарчийн барилдах эрхийг дөрвөн жилээр хасах шийдвэр гаргасан. Мөн 2023 оны наадмын түрүүг хүчингүйд тооцож, түүнээс хойш цолны даваанд унасан бөхчүүдэд цол, чимгийг нөхөн олгох асуудлыг шийдвэрлэхээр болсон. Ингэснээр М.Бадарчийн 2023 оны түрүү хүчингүй болж, улсын арслан цол нь хураагдах нөхцөл бүрджээ.

2024.05.01 — Спортын арбитр эрх хассан шийдвэрийг хэвээр үлдээв

М.Бадарч дээрх шийдвэрийг эс зөвшөөрч Монголын Олон улсын ба Үндэсний спортын арбитрт хандсан. Арбитрын шийдвэрээр түүний допингийн зөрчилтэй холбоотой дөрвөн жилийн эрх хасах шийтгэлийг хэвээр үлдээсэн байна. М.Бадарч өөрийгөө допинг хэрэглээгүй гэж үзэж, шийдвэрийг хүлээн зөвшөөрөхгүй байгаагаа илэрхийлсэн.

2024.05.10 — Давж заалдах шатанд мөн ялагдав

М.Бадарчийн гаргасан гомдлыг Монголын Олон улсын ба Үндэсний спортын арбитрын допингийн давж заалдах комисс хэлэлцээд, өмнөх шийдвэрийг хэвээр үлдээжээ. Ингэснээр түүний барилдах эрхийг дөрвөн жилээр хассан шийдвэр хүчин төгөлдөр хэвээр үлдсэн.

2027.07.13 — Эрх нь дуусгавар болох тов

Хүчин төгөлдөр байгаа шийдвэрээр М.Бадарчийн барилдах эрх 2027 оны долдугаар сарын 13 хүртэл сэргэхгүй. Өөрөөр хэлбэл, шийтгэл өөрчлөгдөөгүй тохиолдолд тэр 2027 оны долдугаар сарын 13-наас өмнө үндэсний бөхийн барилдаанд оролцох боломжгүй.

2026.09.03 — “Барилдана” гэсэн мэдэгдэл хийв

Гэвч М.Бадарч дахин барилдах асуудал сөхөгдөв. Тэрбээр есдүгээр сарын 5-нд болох Барилгын салбар үүсэж, хөгжсөний 100 жилийн ойд зориулсан 256 бөхийн барилдаанд зодоглохоор төлөвлөж байгаагаа мэдэгдсэн. М.Бадарчийн хэлснээр, Монголын Үндэсний бөхийн холбооноос допингийн байгууллагаас тодруулахыг зөвлөсөн бөгөөд МОНАДА-аас “өөрөө мэд” гэсэн хариу өгсөн гэх тайлбар хийжээ. Гэвч барилдаанд бүртгүүлэх үед түүнийг бүртгэх боломжгүй гэсэн байна.

2026.09.04 — Эрхийг нь хэн сэргээх вэ гэсэн асуудал үүсэв

Өнөөдрийн байдлаар М.Бадарчийн барилдах эрхийг сэргээсэн тухай хүчин төгөлдөр шинэ шийдвэр гарсан гэх албан мэдээлэл байхгүй байна. Харин МҮБХ-ноос өнөөдөр 12:30 цагт цаг үеийн асуудлаар мэдээлэл хийхээр болсон бөгөөд энэ нь М.Бадарч болон бусад эрх хасуулсан бөхчүүдийн эрхийг сэргээх асуудалтай холбоотой.

Л.Баяр