Хөлбөмбөгийн дэлхийн хамгийн том баяр болох 2026 оны FIFA World Cup албан ёсоор эхэлж, нээлтийн тоглолтод зохион байгуулагч орны нэг Мексикийн шигшээ баг Өмнөд Африкийг 2:0-ээр буулган авлаа. Тоглолт Мехико хотын домогт Ацтека цэнгэлдэх хүрээлэнд болж, 80 мянга гаруй хөгжөөн дэмжигчийн өмнө дэлхийн аваргын анхны гоолууд орсон юм.
Энэ удаагийн ДАШТ нь түүхэн ач холбогдолтой. Учир нь анх удаа 48 баг оролцож, нийт 104 тоглолт явагдах бөгөөд АНУ, Канад, Мексик гэсэн гурван улс хамтран зохион байгуулж байна. Тэмцээн зургаадугаар сарын 11-нээс долоодугаар сарын 19 хүртэл үргэлжлэх юм.
Нээлтийн тоглолтын өмнө болсон ёслолын ажиллагаа үзэгчдийн анхаарлыг татав. Колумбын алдарт дуучин Шакира болон Нигерийн уран бүтээлч Бёрна Бой нар ДАШТ-ий албан ёсны сүлд дууг толилуулж, Мексикийн соёл, уламжлалыг харуулсан сүрлэг үзүүлбэрүүд болсон байна.
Харин тоглолтын талбай дээр Мексикийн шигшээ илүү тоглолт үзүүлж, эхний үеэс санаачилгыг гартаа авсан. Улмаар довтлогч Рауль Хименес болон Хулиан Киньонес нарын гоолоор ялалтаа баталгаажуулсан юм. Тоглолтын төгсгөлд Мексикийн ахлагч Сесар Монтес улаан хуудас авч талбайг орхисон ч эзэн баг гурван оноогоо бүрэн авлаа.
Ингэснээр Мексикийн шигшээ дэлхийн аваргын нээлтийн тоглолтод анхны ялалтаа байгуулсан онцгой амжилтын эзэн болов. Өмнө нь тэд долоон удаа ДАШТ-ий эхний тоглолтод оролцохдоо ялалт байгуулж чадаагүй байсан юм.
"А" хэсгийн нөгөө тоглолтод Өмнөд Солонгос болон Чехийн шигшээ багууд хүч үзэх бөгөөд энэ хэсгээс хасагдах шатанд шалгарах өрсөлдөөн ийнхүү эхэлж байна.
2026 оны ДАШТ-ий эхний шүгэл ийнхүү дуугарч, дэлхийн хөлбөмбөгийн хамгийн нэр хүндтэй цомын төлөөх нэг сарын гаруй үргэлжлэх өрсөлдөөн албан ёсоор эхэллээ.
Л.Баяр
