АНУ-ын шигшээ баг нутагтаа зохион байгуулагдаж буй Хөлбөмбөгийн ДАШТ-2026 тэмцээний эхний тоглолтдоо Парагвайн шигшээ багийг 4:1-ээр буулган авч, “D” хэсгийг өнгөлөх эхний алхмаа амжилттай хийлээ.

Лос Анжелес хотын цэнгэлдэх хүрээлэнд болсон тоглолтод талбайн эзэд эхний минутаас довтолгооны санаачилгыг гартаа авч, долоодугаар минутад Парагвайн хамгаалагч Дамиан Бобадильягийн өөрийн хаалгандаа оруулсан гоолоор тэргүүлж эхэлсэн юм. Үүний дараа багийн гол од Кристиан Пулишич хоёр гоолын эхлэлийг тавьж, довтлогч Фоларин Балогун эхний үеийн төгсгөл хүртэл хоёр удаа гоолдсоноор АНУ завсарлага руу 3:0-ийн илт давуу байдалтай орсон байна.

Францад төрсөн ч АНУ-ын шигшээг сонгон тоглодог Балогун энэ тоглолтын баатар болж, ДАШТ-ий эхний тойргийн хамгийн тод оддын нэгээр нэрлэгдэв. Түүний хоёр дахь гоол нь хамгаалагчдыг хуурч, алсын хүчтэй цохилтоор орсон нь гайхалтай байлаа.

Хоёрдугаар үед Парагвай тоглолтын хэмнэлийг бага зэрэг сэргээж, 73 дахь минутад сэлгээгээр орж ирсэн Маурисио багийнхаа нэр төрийн гоолыг оруулсан ч тоглолтын төгсгөлд Жио Рейна нэмэлт цагт дөрөв дэх бөмбөгийг хаалганд шигтгэснээр АНУ ялалтаа баталгаажууллаа.

70 мянга гаруй хөгжөөн дэмжигч цугласан тоглолтод олон алдартан хүрэлцэн ирж үзсэн бөгөөд нээлтийн ажиллагаанд дуучин Кэти Перри оролцсон нь уур амьсгалыг улам өргөсөн юм. Энэхүү тоглолт нь АНУ-ын нутаг дээр болсон эрэгтэйчүүдийн ДАШТ-ий тоглолт 1994 оноос хойших анхны тохиолдол болж түүхэнд үлдлээ.

Ийнхүү гурван оноо авсан АНУ хэсгийн хүснэгтийг тэргүүлж эхэлсэн бол дараагийн тоглолтоо Австралийн эсрэг хийхээр болж байна. Харин Парагвай хэсгээс гарах боломжоо хадгалахын тулд Туркийн эсрэг заавал оноо авах шаардлагатай.

Л.Баяр