2026 оны хөлбөмбөгийн Дэлхийн аварга шалгаруулах тэмцээн залуу авьяастнуудаас гадна спортын түүхэнд нэрээ мөнхөлсөн олон ахмад оддын сүүлчийн том тайз болж байна. Энэ удаагийн ДАШТ-д 40 болон түүнээс дээш насны долоон тоглогч бүртгэгдсэн нь тэмцээний түүхэн дэх хамгийн өндөр үзүүлэлт болжээ. Шотландын туршлагатай хаалгач Крейг Гордон 43 насандаа оролцож буйгаар тэмцээний хамгийн ахмад тоглогч болсон бол Кристиано Роналду 41 насандаа хамгийн ахмад талбайн тоглогчоор нэрлэгдэж байна.

1. Craig Gordon (Шотланд)

43 нас 162 хоног

Шотландын домогт хаалгач Крейг Гордон анх удаа ДАШТ-д оролцож байна. Тэрбээр 20 гаруй жилийн мэргэжлийн карьераа үргэлжлүүлж, хүнд бэртэл гэмтлийг даван туулсны эцэст дэлхийн аваргын тайзанд гарч иржээ. Гордон бол энэ удаагийн тэмцээний хамгийн ахмад тоглогч юм.

2. Cristiano Ronaldo (Португал)

41 нас 126 хоног

Дэлхийн хөлбөмбөгийн хамгийн алдартай тоглогчдын нэг Роналду зургаа дахь ДАШТ-дээ оролцож байгаа нь түүхэн амжилт юм. Тэрбээр 2006 оноос хойш бүх ДАШТ-д тоглосон цөөхөн тоглогчдын нэг бөгөөд одоо ч Португалын довтолгооны гол хүч хэвээр байна.

3. Guillermo Ochoa (Мексик)

40 нас 333 хоног

Мексикийн шигшээ багийн хаалгач Очоа мөн зургаа дахь ДАШТ-дээ оролцож байна. Тэрбээр 2014, 2018, 2022 оны ДАШТ-үүдэд гайхалтай хаалтуудаараа дэлхий нийтийн анхаарлыг татаж байсан билээ.

4. Luka Modrić (Хорват)

40 нас 275 хоног

2018 оны ДАШТ-ий мөнгөн медальт Хорватын шигшээг ахалж явсан Лука Модрич 40 нас хүрсэн ч багийнхаа хөдөлгөгч хүч хэвээр байна. Түүний туршлага, дамжуулалт, тоглолт унших чадвар нь Хорватын гол зэвсэг хэвээр байгаа юм.

5. Edin Džeko (Босни ба Герцеговин)

40 нас 86 хоног

Босни ба Герцеговины бүх цаг үеийн шилдэг довтлогчдын нэг Эдин Жеко шигшээ багийнхаа ахлагчийн үүргийг гүйцэтгэж байна. Түүний гоолын мэдрэмж, манлайлал багтаа асар үнэ цэнтэй хэвээр байна.

6. Manuel Neuer (Герман)

40 нас 76 хоног

2014 оны дэлхийн аварга багийн гол баатруудын нэг Мануэль Нойер орчин үеийн “sweeper-keeper” хэв маягийг төгөлдөржүүлсэн хаалгач хэмээн үнэлэгддэг. Тэрбээр Германы шигшээ багийн туршлагын багана хэвээр байна.

7. Vozinha (Кабо Верде)

40 нас 8 хоног

Кабо Вердегийн ахмад хаалгач Возинья улсынхаа түүхэн анхны ДАШТ-д оролцож буй бүрэлдэхүүний хамгийн туршлагатай тоглогч юм.

8. Fernando Muslera (Уругвай)

39 нас 360 хоног

Уругвайн хаалгач Фернандо Муслера олон улсын тавцанд 15 гаруй жил тоглож байгаа бөгөөд шигшээ багийнхаа хамгийн найдвартай тоглогчдын нэгээр тооцогддог.

9. Yuto Nagatomo (Япон)

39 нас 272 хоног

Японы хамгаалагч Юто Нагатомо хурд, тэсвэр хатуужлаа алдаагүй хэвээр байгаа бөгөөд Азийн хөлбөмбөгийн хамгийн ахмад идэвхтэй тоглогчдын нэг болжээ.

10. Hernán Galíndez (Эквадор)

39 нас 73 хоног

Эквадорын туршлагатай хаалгач Эрнан Галиндес ДАШТ-д оролцож буй хамгийн ахмад тоглогчдын жагсаалтыг хааж байна. Тэрээр залуу бүрэлдэхүүнтэй Эквадорын шигшээ багийн тогтвортой байдлыг хангах гол хүн юм.

Домгуудын сүүлчийн бүжиг

Энэ жагсаалтад багтсан тоглогчдын ихэнх нь замналынхаа сүүлчийн ДАШТ-дээ оролцож байгаа. Ялангуяа Роналду, Модрич, Очоа, Нойер, Муслера зэрэг тоглогчид 20 орчим жилийн турш дэлхийн хөлбөмбөгийн оргилд тогтсон домгууд билээ. Харин Аргентины ахлагч Лионел Месси 38 нас 352 хоногтойгоор шилдэг 10-ын босгоос багахан зөрүүтэйгээр 12 дугаарт бичигдэж байна. 2026 оны ДАШТ бол зөвхөн шинэ оддын төрөх тайз биш, харин нэгэн үеийн агуу домгуудын сүүлчийн бүжиг байх нь гарцаагүй билээ.

Л.Баяр