Хятадын Ерөнхий сайд асан Жу Рунжи 97 насандаа таалал төгслөө. Тэрээр 1990-ээд оны сүүл, 2000-аад оны эхээр Хятадын эдийн засгийг шинэ шатанд гаргасан гол шинэчлэгчдийн нэг байв. Жу Рунжи 1928 оны аравдугаар сарын 1-нд Хунань мужийн Чанша хотод төржээ. Цинхуа их сургуулийг цахилгааны инженер мэргэжлээр төгссөн тэрээр төрийн байгууллагад ажиллаж эхэлсэн ч 1950-иад оны улс төрийн кампанит ажлын үеэр “барууны үзэлтэн” хэмээн буруутгагдан, Коммунист намаас хөөгдөж, олон жил улс төрийн дарамтад орсон байна. 1978 онд түүнийг цагаатгаж, намд нь буцаан элсүүлжээ.

1980-аад оны сүүлээр улс төрийн карьер нь эрчимжиж, 1987 онд Шанхай хотын дарга болсон. Тэрээр хотын эдийн засгийг шинэчилж, зах зээлийн зарчмыг нэвтрүүлэхэд чухал үүрэг гүйцэтгэсэн юм.

1991 онд Төрийн зөвлөлийн Шадар сайд болж, 1993 онд Хятадын Ардын банкны ерөнхийлөгчөөр ажиллахдаа инфляцтай тэмцэх хатуу бодлого хэрэгжүүлжээ. Тухайн үед инфляц бараг 20 хувьд хүрсэн байсан бөгөөд Жугийн бодлогын үр дүнд эдийн засгийн хэт халалт буурсан гэдэг.

Түүний хамгийн том шинэчлэлүүдийн нэг нь татварын тогтолцоог өөрчилж, төв засгийн газрын санхүүгийн хяналтыг бэхжүүлсэн явдал байв. Мөн төрийн өмчит компаниудыг шинэчилж, банк санхүүгийн салбарт бүтцийн өөрчлөлт хийсэн. Гэвч энэ шинэчлэлийн улмаас олон сая хүн ажлын байраа алдаж, нийгмийн тэгш бус байдал нэмэгдсэн гэх шүүмжлэл ч дагуулжээ. Жу Рунжи 1998-2003 онд Ерөнхий сайдаар ажиллахдаа Хятадыг Дэлхийн худалдааны байгууллагад элсүүлэх хэлэлцээрт голлох үүрэг гүйцэтгэсэн. Хятад улс 2001 онд ДХБ-д элссэнээр экспорт, гадаадын хөрөнгө оруулалт эрс нэмэгдэж, дэлхийн үйлдвэрлэлийн томоохон төв болон хөгжих суурь нь тавигдсан юм.

Түүнийг хэвлэлүүд тухайн үед “Хятадын эдийн засгийн хаан” хэмээн нэрлэдэг байв. Гэвч түүний үеийн зарим бодлого өнөөдөр Хятадын орон нутгийн өр, үл хөдлөх хөрөнгийн зах зээлийн асуудал зэрэгт нөлөөлсөн гэж эдийн засагчид үздэг.

2003 онд Ерөнхий сайдын албан тушаалаас бууснаасаа хойш Жу олон нийтийн амьдралаас харьцангуй хол байжээ. Түүний нас барсан тухай мэдээ Хятадын эдийн засгийн шинэчлэлийн нэгэн чухал үе дууссаныг илэрхийлж байна.

Л.Баяр