Улсын онцгой комиссын шуурхай штабын дарга, хурандаа Б.Ууганбаяр мэдээлэл өглөө. Тэрбээр "Улаанбаатар хотод 13 тусгаарлах байранд 983 хүнийг тусгаарлан ажиглаж байна. Харин тусгай үүргийн онгоцоор ирсэн 558 иргэдийг 10 тусгаарлах байранд байрлуулсан байгаа. 1541 хүнийг тусгаарлан ажиглаж байна. Харин орон нутагт 14 тусгаарлах байранд 112 хүн байгаа. Дээрх газруудад 223 төрийн албан хаагч үүрэг гүйцэтгэж байна. 

Хавдар судлалын үндэсний төвд халдвар илэрсэнтэй холбоотойгоор 84 хүнийг тусгаарлах байранд шилжүүлсэн. Харин гэрийн ажиглалтад 558 иргэн байна. Тэдгээр иргэд халдвар хамгааллын дэглэм баримтлахыг зөвлөж байна. 

Мөн ХӨСҮТ-өөс эдгэрээд дараагийн шатруу шилжих 127 иргэнийг Яармагийн эмнэлэг рүү шилжүүлсэн. Харин дээрх газраас 343 иргэн гэрийн ажиглалт руу шилжүүлсэн. Орон нутгийн иргэдийг тухайн аймгийн удирдлагууд зохион байгуулалттайгаар өөрсдийн унаагаар татан авч байгаа.

Замын-Үүд боомтоор өдөртөө 50-60 автомашин гарах болон орох чиглэлд нэвтэрч байгаа. Ачаа тээвэр түжрэх явдал гарч байгаа. Үүнийг зохицуулах ажил хийж байна. Мөн Цагааннуурын боомтоор шатахууны тээвэр орж ирж байгаа.  

Эрүүл мэндийн салбарт тусламжийн шугамаар орж ирж байгаа ачаа тээвэр болон шуудан холбоогоор орж байгаа ачаа тээврийг нэвтрүүлэх ажлыг шуурхай зохион байгуулж байна. 

Өчигдөр орой карго ачаа татан авахдаа Сөүлээс эрүүл мэндийн шалтгаантай, жирэмсэн, санхүүгийн хүндрэлд орсон зэрэг шалтгаантай 34 иргэнээ татан авсан. Өнөөдрийн байдлаар нийт 5301 хүн үүрэг гүйцэтгэж байна" гэв. 

Б.Баатар