Дэлхий нийт цар тахалтай нүүр тулаад жил гаруйн хугацааг үджээ. Энэ хугацаанд дэлхийн улсууд өөр өөрсдийн хэмжээнд хөл хорио тогтоож, цар тахлыг хумих нөгөө талаар эдийн засгаа хэрхэн сэргээх талаар бодлого боловсруулан уралдаж байна. Халдварын тархалтыг барих гол зүйл нь дэлхийн хүмүүс шинэ амьдралд дасан зохицох. Нөгөө нэг нь гэвэл вакцин гэж үзэж буй.

Томоохон гүрнүүд ч вакцин бүтээхээр уралдаж, бусад улсуудын хувьд аль болох нэг алхмын өмнө худалдан авч иргэдээ дархлаажуулах, хэвийн амьдрал руу шилжихээр чармайж байна. Цар тахалтай тулгарсан жил гаруйн энэ хугацаа бидэнд “Өвчингүй бол жаргал, өргүй бол баян” гэдгийг сануулав. Одоогийн нөхцөлд COVID-19 хорвоогийн нэг хэцүү болж байна.

Үүнтэй зэрэгцэн бас нэг хэцүү байна. Манай улс цагаан сарын баярыг улсаараа тэмдэглэхийг хориглож 12 хоногийн хугацаанд хатуу хөл хорионд шилжин “халдвар”-аа шүүрдэхээр ажиллаж байна. Өдгөө дээрх хугацааны тал нь өнгөрчээ.

Төр засгийн зүгээс энэ үеэр зайлшгүй ажиллах шаардлагатай 14 байгууллагын үйл ажиллагааг зөвшөөрч, багтаагүй байгууллагын иргэдийг аль болох гэртээ байхыг зөвлөж буй. Гэвч дайны үеэр дажин гэгчээр ахуйн архидалт, гэр бүлийн хүчирхийллийн тоо эрс ихэсчээ. Жишээ дурдахад, өнгөрсөн битүүний өдрөөс шинийн 3-ны өдрийг хүртэлх хугацаанд улсын хэмжээнд гэр бүлийн хүчирхийллийн 559 дуудлагыг бүртгэжээ.

Хатуу хөл хорионы үе учраас гадагш гарч болохгүй. Гэртээ байя гэхээр хүчирхийлэгчийн гарт өртөх айдастай. Зарим өрхүүдэд ийм л өдрүүд өнгөрч байх шиг байна.

А.Сүх