“Тэдний өрийг бид төлөхгүй” хэлэлцүүлэг болж байна. Энэ үеэр сэтгүүлч Ч.Лодойсамбуу “Зээлийг зориулалтын бусаар өгсөн, хянах эрхээ эдлээгүй, төрийн байгууллага, Төв банкны удирдлагууд, нэр бүхий албан тушаалтнуудтай ямар хариуцлага тооцох вэ гэсэн асуултыг МАН-ын Ерөнхий нарийн бичгийн дарга Д.Амарбаясгалангаас асуусан юм.

Энэ асуултад Д.Амарбаясгалан хариулахдаа “Хөгжлийн банктай холбоотой энэ асуудлыг нягталж шалгах, үр дүнд хүргэх зорилгоор Засгийн газар АТГ-т шилжүүлсэн. АТГ-аас мэдээлэл хийхдээ нийтдээ 52 аж ахуйн нэгжийн зээлийг шалгаж, нягтлах шаардлагатай гэж үзэж байгаагаа мэдэгдсэн. Энэ асуудлыг хуулийн дагуу хянаж шалгаад хаанаа алдаа дутагдал гарсан, албан тушаал эрх мэдлээ хэн ашигласан, хяналт тавих үүрэгтэй этгээдүүд нь хуулийн дагуу ажилласан эсэх нь тодорхой болно.

Хөгжлийн банкнаас зээл олгоход Төлөөлөн удирдах зөвлөлөөс эхлээд шат шатанд ажиллаж байсан этгээдүүд хариуцлага хүлээх ёстой болов уу гэж бодож байна. Хөгжлийн банкны ТУЗ-ийн гишүүнээр хоёр ч удаа ажиллаж байсан нөхөр Эрдэнэтийн алдарт 49 хувийн төлөөлөл болчихсон, тэнд захирал хийгээд явж байсан, Улаанбаатар банкны захирлаар ажиллаж байсан нөхөр Хөгжлийн банкны ТУЗ-ийн гишүүн болчихсон байсан гэх мэт мэдээлэл хэвлэлээр гарч ирж байна. Гэтэл бондны 1,5 сая ам доллар хоёрхон банкинд байршиж байсан мэдээлэл байна. Үүнийг нягтлах ёстой. Эдгээр зүйлүүдийг нягталж, хуулийн дагуу шалгах ёстой. Ингэж байж үр дүнд хүрнэ. Их хэмжээний зээл аваад эргүүлж төлөхгүй, улсад хохирол учруулж байгаа хүмүүстэй хариуцлага тооцох цаг болсон” хэмээн хариулсан юм.