Төрийн ордонд Монгол Улсын Хөгжлийн банкны асуудлаар нээлттэй сонсгол УИХ гишүүдийн асуулт хариултаар үргэлжилж байна. Энэ үеэр Н.Алтанхуяг ийн хэлэв. Тэрбээр “Хөгжлийн банкны асуудлыг системчлэх гэж оролдлоо. Иймд өөрийн зүгээс дөрвөн үе шатанд хувааж үзсэн.

Эхний алхам, Хөгжлийн банк байгуулагдаад босгосон 600 сая ам.доллараар юу хийсэн бэ? Үүнийг тухайн үеийн ерөнхий сайд байсан С.Батболд, Сангийн сайдаар Д.Хаянхярваа, Хөгжлийн банкны захирлаар Солонгос хүн ажиллаж байсан.

Хоёрдугаар шат, Чингис бонд, Самурай бондын үе. Ерөнхий сайдаар миний бие, Эдийн засгийн сайдаар Н.Батбаяр, Хөгжлийн банкны захирлаар мөн Солонгос хүн байсан.

Өнөөдрийг хүртэл МАН, АН гэсээр байгаад дундуур нь жинхэнэ хулгайчид буюу МАНАН жинхэнэ зохион байгуулалттай гэмт хэрэг болгож ажиллаад, бид хоорондоо хэрэлдээд дуусдаг болчихсон.

Гуравдугаар шат, энэ бол ноцтой үе шүү. Энэ үе 2014 оны 11 дүгээр сарын 05 буюу манай засгийн газрыг огцруулсны маргаашаас эхлээд 2015 онд МАН засаг барих хүртэл үргэлжилнэ. Ерөнхийлөгч асан Ц.Элбэгдорж, М.Энхболд нар зохион байгуулалттайгаар намайг огцруулаад МАНАН-гын засгийн газар байгуулсан. Үүний Ерөнхий сайд нь Ч.Сайханбилэг, Шадар сайд нь одоогийн Ерөнхийлөгч У.Хүрэлсүх, Сангийн сайд нь Ж.Эрдэнэбат, Хөгжлийн банкны ТУЗ-ын дарга Б.Шинэбаатар байсан.

Дөрөвдүгээр шатанд, 2017 онд хөгжлийн банкны хуулийг өөрчилснөөр эхэлсэн. Энэ хуулийг өөрчилснөөс хойш Монгол Улсын хөгжлийн хөтөлбөрүүдийг Хөгжлийн банк санхүүжүүлэх үүрэггүй болсон. Миний хувьд ийм дөрвөн үе шатыг системчилж үзсэн, үүнийг цааш судална биз” гэв.

Т.Мөнхжаргал