УИХ-ын чуулганы Пүрэв гарагийн хуралдаан эхэллээ. Хуралдааны үеэр УИХ-ын гишүүн Б.Пүрэвдорж гишүүн үг хэллээ. Тэрбээр, "Хаврын чуулганаар хэлэлцэх асуудал бага байх шиг байна. Би МАН-ын овсгоотойхон шиг гишүүн байсан бол 500 мянгаас нэг сая хүртэлх тэтгэврийг 15 хувиар, 1-2 сая төгрөгний тэтгэврийг 10 хувиар, хоёр саяаас дээш бол 5 хувиар нэмээд тэтгэврийн зөрүүг ойртуулах арга хэмжээ авах байсан. Даанч тийм гишүүн алга. Дандаа дарга нараа хардаг л гишүүд байна гэж МАН-д би хэлсэн. Нэг талаар магтсан нөгөө талаар шүүмжилсэн. Иргэд тэтгэврийн доод хэмжээг 500 мянган төгрөг болгосонд баяртай байгаа.

Тэгэхдээ бид нарын яриад байгаа тэтгэврийн доод хэмжээг тогтоохдоо 7 жилийн цалингийн дунджаар биш 5 жилийн дунджаар тогтоох энэ хуулийн төслийг яаралтай хэлэлцэж өгөөч ээ. Дөрөвдүгээр сарын хэлэлцэх асуудалд оруулж өгөөч ээ. Хэрвээ оруулахгүй бол би хэлсэн шүү, танай нийгмийн даатгалын багц хууль чинь хойшоо алга болсон. Энэ хавар хэлэлцэхгүйг би баталгаатай мэдэж байна намар хэлэлцэнэ. Намар хэлэлцэхгүй ч үгүй байх, жагсаалтанд оруулна хэлэлцэхгүй. Тэр хуулийнд бүр тэтгэвэр тогтоохдоо 10 жилийн асуудал яригдаж байгаа. Тийм ард иргэдийн эсрэг хууль шийдэж болохгүй. Энэ хуулийг яаралтай хэлэлцэж өгнө үү. Дөрөвдүгээр сарын хэлэлцэх асуудалд оруулахгүй бол Баянхонгор аймагт эхний ээлжинд УИХ-ын даргын тойрогт жагсаал зохион байгуулна. Дараа нь Хэнтий аймагт Ерөнхий сайд, Ерөнхийлөгчийн тойрогт жагсана. Дараа нь байнгын хороо хариуцдаг М.Оюунчимэг гишүүний Чингэлтэй дүүрэг дээр жагсаал зохион байгуулна шүү. Ахмадуудтай цуг жагсана" гэлээ.

А.Сүлд