БНАСАУ-ын төр нийгмийн нэрт зүтгэлтэн, эрх баригч гүрнийг насан туршдаа дэмжигч Ким Ён Нам 97 насандаа таалал төгссөнийг тус улсын төрийн хэвлэлүүд мэдээлжээ. Тэрээр 1998-2019 онд Пхеньяны Ардын дээд хурлын ерөнхийлөгчийн албыг хашсан.
Ким Ён Нам тус улсыг үндэслэгч Ким Ир Сен, түүний хүү Ким Чен Ир, ач хүү Ким Чен Ун нарын дэглэмийн үед янз бүрийн дипломат албан тушаал хашиж байсан юм.
Тэрээр арваннэгдүгээр сарын 3-нд олон эрхтэний дутагдлын улмаас нас барсан гэж Хойд Солонгосын төв мэдээллийн агентлаг (KCNA) мэдээлэв. Тус агентлаг түүнийг “Манай нам, улс орны хөгжлийн түүхэнд онцгой гавьяа байгуулсан ахмад үеийн хувьсгалч” хэмээн тодорхойлсон байна. Түүнд зориулсан төрийн оршуулгын ёслол үйлдэх ажээ.
Ким Ён Нам Солонгосын хойг Японы колончлолын эрхшээлд байх үед "Японы эсрэг эх орончдын" гэр бүлд төржээ. Тэрээр Пхеньян дахь Ким Ир Сений их сургуульд суралцаж, 1950-иад онд ажлын гараагаа эхлэхээсээ өмнө Москвад суралцаж байв.
Эрх баригч намын бага албан тушаалтнаас эхэлж, Гадаад хэргийн сайд болж, улмаар Ким Чен Ирийн төр барьж байх бүх хугацаанд Ардын дээд хурлын даргаар ажилласан. Жинхэнэ эрх мэдэл эрх баригч Кимийн гэр бүлийн гарт хэвээр байсан ч Ким Ён Нам олон улсын тавцанд Хойд Солонгосын нүүр царай болж харагдсан.
Тэрээр 2018 онд Өвлийн Олимпын наадмын үеэр БНАСАУ-ын төлөөлөгчдийг тэргүүлэн Өмнөд Солонгост очиж, тус улсын тухайн үеийн ерөнхийлөгч Мүн Жэ Интэй уулзаж байлаа. Ким Чен Уны нөлөө бүхий эгч Ким Ё Жон төлөөлөгчдийн бүрэлдэхүүнд багтжээ.
Ким Ён Нам өмнө нь Өмнөд Солонгосын ерөнхийлөгч асан 2000 онд Ким Дэ Жун, 2007 онд Ро Му Хён нартай хоёр удаа Солонгос хоорондын дээд хэмжээний уулзалтын үеэр тус тус уулзаж байжээ.
Л.Баяр
