Лионель Месси дэлхийн аваргын цомыг дараалан өргөж чадсангүй. Өнгөрсөн шөнө болсон ДАШТ-ий финалд Аргентины шигшээ Испанид нэмэлт цагт 0:1-ээр ялагдаж, аваргын титмээ хамгаалж чадалгүй мөнгөн медаль хүртлээ. Гэвч энэ тоглолт Мессигийн хөлбөмбөгийн замналын төгсгөл болсон ч түүний тогтоосон дээд амжилтуудын төгсгөл биш юм.

Месси дэлхийн аваргын түүхэнд хамгийн олон тоглолтод оролцсон тоглогч хэвээр үлдлээ. Тэрбээр зургаан удаагийн ДАШТ-д оролцож, нийт 26 тоглолтод талбайд гарсан нь бүх цаг үеийн рекорд юм. Мөн дэлхийн аваргын тоглолтуудад хамгийн олон минут тоглосон, хамгийн олон удаа багийн ахлагчаар талбайд гарсан тоглогчдын нэг болж, энэ үзүүлэлтүүдээрээ дээд амжилтын эзэн болсон.

Түүний ДАШТ-д оруулсан гоолын тоо 21. Энэ нь Аргентины шигшээ багийн дэлхийн аваргын түүхэн дэх хамгийн өндөр үзүүлэлт бөгөөд Месси түүхэн дэх хамгийн агуу тоглогчдын нэг гэдгээ зөвхөн цомоор бус, тоогоор ч баталсан хэрэг.

Мессигийн бас нэгэн онцгой амжилт бол дэлхийн аваргын зургаан өөр тэмцээнд гоолын дамжуулалт өгсөн цорын ганц тоглогч болсон явдал юм. Тэрбээр 2006, 2010, 2014, 2018, 2022,2026 оны ДАШТ-үүдэд бүгдэд нь ассист бүртгүүлж, өөрийн тоглолтын олон талт чанарыг харуулсан. Өөрөөр хэлбэл Месси зөвхөн гоол оруулдаг довтлогч биш, багийн тоглолтыг бүтээдэг хөлбөмбөгч юм.

Түүний нэрийг ДАШТ-ий түүхэнд онцгой болгосон өөр нэг үзүүлэлт бол гоол болон гоолын дамжуулалтын нийлбэр үзүүлэлт. Месси дэлхийн аваргын түүхэн дэх хамгийн олон гоолын оролцоотой тоглогчдын нэг бөгөөд энэ үзүүлэлтээрээ Пелегийн үеийн домогт амжилтуудыг давсан. 2026 оны тэмцээний өмнөх байдлаар түүний ДАШТ дэх гоолын оролцооны нийлбэр 33-д хүрсэн гэж бүртгэгдсэн байна. Энэ тоо одоо 40 гарсан.

Месси мөн дэлхийн аваргын түүхэнд өсвөр насандаа, 20-иод насандаа, 30-аад насандаа гоол оруулсан цорын ганц тоглогч болсон. Түүний замнал 2006 онд өсвөр насны хүү байх үеэс эхэлж, 2022 онд дэлхийн аваргын цом өргөсөн ахмад тоглогч болон үргэлжилсэн. Тэр өөр өөр үеийн хөлбөмбөгийн эринүүдийг нэг карьертаа холбож чадсан ховор тоглогч юм.

Гэхдээ Мессигийн рекордууд зөвхөн ДАШТ-ээр хязгаарлагдахгүй. Тэрбээр “Ballon d'Or”-ын түүхэнд хамгийн олон удаа буюу найман удаа хүртсэн нэгэн. Мөн клубийн түвшинд “Барселона”-гийн түүхэн дэх хамгийн олон гоолтой тоглогч болж, Испанийн Ла Лигийн түүхэн дэх хамгийн олон гоолын рекордыг эзэмшдэг. Үүн дээр нэмээд Европын хөлбөмбөгийн дээд түвшинд хамгийн олон гоол, ассист, хувийн шагналын рекордуудын ихэнхийг өөрийн нэр дээр үлдээжээ.

Түүний хамгийн том өв бол магадгүй тоогоор хэмжихэд хэцүү зүйл. Месси хөлбөмбөгийг зөвхөн хүч, хурд, биеийн давуу тал дээр тоглодог спорт биш гэдгийг харуулсан. Түүний зүүн хөл, талбайг унших чадвар, хэдхэн сантиметрийн зайд бөмбөгийг удирдах мэдрэмж, хамгаалагчдын дунд орон зай бий болгох авьяас нь бүхэл бүтэн үеийн тоглогчдод үлгэр дуурайл болсон.

Испанийн эсрэг 2026 оны финалд ялагдсан нь Мессигийн дэлхийн аваргын замналд гунигтай цэг тавилаа. Гэвч 2014 оны финалын ялагдал, 2016 оны Копа Америкагийн харамсал, дараа нь 2022 онд дэлхийн аварга болсон түүний замнал нэг зүйлийг харуулсан. Месси карьерынхаа үнэ цэнийг ганц тоглолт, ганц цомоор хэмжүүлэх тоглогч биш.

Тэр таван ДАШТ-д тоглож, дэлхийн аваргын түүхэнд хамгийн олон тоглолтод оролцож, Аргентины хамгийн олон гоолыг оруулж, хамгийн олон гоолын оролцоог бүтээж, үе үеийн хөлбөмбөгчдийн мөрөөддөг бараг бүх дээд амжилтыг шинэчилсэн.

Испани цомыг өргөсөн. Аргентин мөнгөн медаль хүртсэн. Харин Лионел Месси хөлбөмбөгийн түүхэнд үлдэх байр сууриа аль хэдийн эзэлсэн. Тэр цомтой, нэр хүндтэй, дурсагдах гавьяатай нэгэн.

Л.Баяр