Төр, нийгмийн нэрт зүтгэлтэн, Монголын ардчилсан хөдөлгөөний удирдагчдын нэг С.Зориг агсны хөшөөг өнгөрсөн долдугаар сарын 30-наас 31-нд шилжих шөнө зөвшөөрөлгүйгээр нүүлгэсэн үйл явдал олны анхаарлыг татлаа.
Нийслэлийн Сүхбаатар дүүргийн нутаг дэвсгэрт, нийтийн эзэмшлийн талбайд байрлах уг хөшөөг нүүлгэх ажлыг “Шинэ дэвшилт холбоо”, “Монголын ардчилсан холбоо” хамтран зохион байгуулсан бөгөөд зөвшөөрөл олгосон Сүхбаатар дүүргийн Засаг дарга М.Алтангэрэл хэд хэдэн хууль, журам зөрчсөн гэж нийслэлийн удирдлагууд үзжээ. Үүний улмаас түүнд сахилгын шийтгэл ногдуулж, цалинг нь бууруулах арга хэмжээ авсан байна.
1990 оны ардчилсан хувьсгалын бэлгэдэл болсон С.Зориг агсны хөшөөг тойрсон энэхүү маргаан нийгмийн өргөн хүрээнд хэлэлцүүлэг өрнүүлэв. Ингээд бид хөшөөг сууринаас нь хөдөлгөсөн үйл явдалтай холбоотой онцлох зургаан фактыг хүргэж байна.
1. Хөшөөг шөнөөр хулгайлсан нь...
С.Зориг агсны хөшөө 2026 оны долоодугаар сарын 31-ний шөнө буюу 03:00 цагийн орчимд Төв шуудангийн урд байрлалаас нь зөөвөрлөгджээ. Энэ үйл явдлыг "Шинэ дэвшилт холбоо", "Монголын ардчилсан холбоо ”хоорондоо тохиролцон хийсэн нь тодорхой болсон. Нийслэлийн удирдлагын мэдээлснээр энэ ажиллагааг Нийслэлийн Засаг даргын Тамгын газраас зөвшөөрөөгүй байсан гэж мэдэгдсэн байна. Нүүлгэсний дараа хөшөөг Монголын Ардчилсан Холбооны байрны үүд орчимд шилжүүлсэн талаар мэдээлсэн. Энэ нь олон нийтийн дунд “яагаад, ямар үндэслэлээр нүүлгэв?” гэсэн асуултыг дагуулсан юм.
2. АН-ын дарга О.Цогтгэрэл мэдэгдэл хийв
Маргааш нь АН-ын дарга О.Цогтгэрэл "С.Зориг агсны хөшөөний асуудал нь Монголын ардчилал, Ардчилсан намын хувьд асар чухал ач холбогдолтой. Энэ бол зүгээр нэг хувь хүний хөшөө, дурсгалын асуудал биш. Харин ардчилсан үнэт зүйл, хүний эрх, эрх чөлөөг дээдэлсэн үзэл санаа, итгэл үнэмшил, итгэл найдварын томоохон бэлгэдэл юм. Тиймээс 2-3 төрийн бус байгууллага хоорондоо тохиролцоод нүүлгэн шилжүүлчих хэмжээний асуудал огт биш. С.Зориг агсны гэр бүл болон С.Зориг сангаас зөвшөөрөл аваагүй, цаашлаад Ардчилсан намд мэдэгдэлгүйгээр хөшөөг нүүлгэн шилжүүлсэн байна. Энэ нь хууль, эрх зүйн болон ёс зүйн аль ч талаасаа байж боломгүй үйлдэл юм. Дахин хэлэхэд, С.Зориг агсны хөшөө бол зөвхөн нэг хүний дурсгалын хөшөө биш. Энэ бол Монголын ардчиллын үнэт зүйл, итгэл найдварын бэлгэдэл" хэмээсэн.
3. Хотын удирдлагын мэдэгдэл
Маргааш өдөр нь буюу наймдугаар сарын 01-ний өдөр Нийслэлийн Засаг дарга Б.Пүрэвдагва С.Зоригийн хөшөөг зөвшөөрөлгүй нүүлгэсэн гэж мэдэгдэж, хөшөөг буцаан байрлуулах үүргийг холбогдох байгууллагуудад өгсөн. Мөн хөшөө байрлаж буй талбайд барилга байгууламж барих асуудалд анхаарна гэдгээ илэрхийлсэн.
4. Хөшөөг эргүүлэн хуучин байранд нь байрлуулсан
Маргаан, эсэргүүцлийн дараа С.Зориг агсны хөшөөг хуучин байрлалд нь буцаан байрлуулсана. Үйл явдал нь зөвхөн нэг хөшөөний асуудал биш, харин Монголын ардчиллын түүхэн дурсгал, нийтийн эзэмшлийн газар, улс төрийн бэлгэдлийн талаарх маргаан болж өрнөв.
5. Сүхбаатар дүүргийн удирдлагад хариуцлага тооцов
С.Зориг агсны хөшөөг нүүлгэх зөвшөөрөл олгосонтой холбоотойгоор Сүхбаатар дүүргийн Засаг дарга М.Алтангэрэлд хариуцлага тооцож, үндсэн цалинг нь гурван сарын хугацаанд хасах шийтгэл ногдуулжээ. Нийслэлийн удирдлагын мэдээлснээр, тэрбээр хөшөөг нүүлгэх зөвшөөрөл олгохдоо нийслэлийн өмч болон соёлын өвийг хамгаалах чиг үүргийн хүрээнд эрх хэмжээгээ хэтрүүлсэн гэж үзсэн байна. Ийнхүү шөнийн цагаар нүүлгэсэн С.Зоригийн хөшөөг буцаан хуучин байранд нь байрлуулсны дараа зөвшөөрөл олгосон албан тушаалтанд сахилгын арга хэмжээ авсан юм.
6. ИЗНН-ынхан мэдэгдэл хийв
Тэд мэдэгдэлдээ, "Хүрэл, чулуугаар цутгасан хөшөөг машинд ачиж, үүрээр өөр газар зөөж болно. Гэтэл тэр хөшөөний ард байгаа мөн чанар,үнэт зүйл ард түмнийх байх ёстой гэсэн итгэл, үнэнийг нүүр тулан хэлэх зориг, шударга ёсны төлөө эвлэршгүй зогсох үзлийгхулгайгаар зөөж чадах уу? Чадахгүй. Учир нь тэр нь чулуунд биш, ард түмний зүрхэнд байдаг" хэмээжээ.
Дэлгэрэнгүй унших: https://www.24tsag.mn/a/247477
Л.Баяр
Сэтгэгдэл (2)