Өмнөд Солонгосын Инчон олон улсын нисэх буудал 2026 оны эхний хагас жилийн байдлаар олон улсын зорчигч тээврийн хэмжээгээр дэлхийд тэргүүлж, Их Британийн Лондонгийн Хитроу нисэх буудлыг ардаа орхилоо. Энэ нь Инчон нисэх буудал 2001 онд үйл ажиллагаагаа эхлүүлснээс хойш анх удаа дэлхийн тэргүүлэх байр сууринд хүрсэн тохиолдол болж байна. 

Инчон нисэх буудал энэ оны нэгдүгээр сараас зургадугаар сар хүртэл 38.39 сая олон улсын зорчигч хүлээн авсан нь өмнөх оны мөн үеэс 6.3 хувиар өссөн үзүүлэлт юм. Харин Лондонгийн Хитроу 37.79 сая, Сингапурын Чанги 34.53 сая олон улсын зорчигч хүлээн авчээ. Уг зэрэглэлийг Олон улсын нисэх буудлуудын зөвлөл буюу ACI-ийн олон улсын зорчигч тээврийн урьдчилсан мэдээлэлд үндэслэн гаргасан байна.

Инчоны өсөлтөд олон улсын нислэгийн сүлжээ өргөжсөнөөс гадна дэлхийн геополитикийн нөхцөл байдал нөлөөлжээ. Ойрх Дорнод дахь зөрчил мөргөлдөөнөөс шалтгаалан Дубай зэрэг томоохон дамжин өнгөрөх төвүүдийн нислэгийн хөдөлгөөнд өөрчлөлт гарч, Европ руу чиглэсэн зорчигчдын тодорхой хэсэг Инчоноор дамжин зорчих болсон байна. Тухайлбал, Инчоноор дамжин өнгөрсөн зорчигчдын тоо эхний зургаан сард 4.24 саяд хүрч, жилийн өмнөхөөс 18.1 хувиар өссөн байна. Европын чиглэлд дамжин өнгөрсөн зорчигчдын тоо бүр 63.2 хувиар нэмэгджээ. Мөн гуравдугаар сараас зургадугаар сарын хооронд гадаадын иргэд нийт зорчигчдын 44.4 хувийг эзэлсэн нь тус нисэх буудлын хувьд улирлын дээд үзүүлэлт болсон байна.

Инчон нисэх буудал сүүлийн жилүүдэд дэлхийн томоохон агаарын тээврийн зангилаа болох байр сууриа эрчимтэй бэхжүүлж иржээ. Тус нисэх буудал 2002 онд олон улсын зорчигч тээврээр дэлхийд 10 дугаарт жагсаж байсан бол 2018 онд тавдугаар байр, 2024 онд гуравдугаар байрт хүрч, улмаар энэ жил анх удаа тэргүүлэгч болжээ. Мөн 2024 оны арваннэгдүгээр сард өргөтгөлийн дөрөвдүгээр үе шат дууссанаар Инчон жилд 106 сая хүртэл зорчигч хүлээн авах хүчин чадалтай болсон байна. Өнөөдөр 101 агаарын тээврийн компани тус нисэх буудлыг 53 орны 183 хоттой холбож, олон улсын 158 чиглэлд нислэг үйлдэж байгаа аж.

Инчон нисэх буудал энэ оны долдугаар сарын 7-нд бас нэгэн түүхэн амжилт гаргаж, үйл ажиллагаагаа эхлүүлснээсээ хойш нийт 1 тэрбум зорчигч хүлээн авсан дэлхийн хамгийн хурдан томоохон нисэх буудал болсон байна. Ийнхүү Өмнөд Солонгосын Инчон нисэх буудал зөвхөн Солонгосын төдийгүй Зүүн хойд Азийн агаарын тээврийн гол зангилаа болох байр сууриа улам бататгаж, дэлхийн олон улсын нислэгийн урсгалд өсөн нэмэгдэж буй үүргээ харууллаа. Харин энд нэг зүйлийг тодруулах нь зүйтэй: “дэлхийн хамгийн ачаалалтай нисэх буудал” гэдэг нь нийт зорчигчийн бүх ангиллаар бус, 2026 оны эхний хагасын олон улсын зорчигч тээврийн үзүүлэлтээр дэлхийд тэргүүлсэн гэсэн үг юм.

Л.Баяр