Украины Батлан хамгаалахын сайдын албан тушаалаас саяхан чөлөөлөгдсөн Михайло Федоров дайны нөхцөлд ч ерөнхийлөгчийн сонгууль явуулахыг уриалж, Владимир Зеленскийн засаглалд томоохон сорилт үүсгэлээ. Федоров өчигдөр цахим хуудсаараа есөн минутын видео мэдэгдэл нийтэлж, Украины улс төрийн системд шинэчлэл хийх шаардлагатай болсон гэж мэдэгдсэн байна. Тэрбээр төрийн байгууллагуудын ил тод байдал хангалтгүй, шинэ албан тушаалтнуудыг ур чадвараас нь илүүтэй улс төрийн үнэнч байдлыг нь харгалзан томилдог болсон хэмээн шүүмжилжээ.

Түүний үзэж буйгаар, дайн үргэлжилж байгаа нь ардчиллын үйл явцыг бүрэн зогсоох шалтгаан болох ёсгүй аж. Федоров сонгуулийг аюулгүй явуулах эрх зүйн тогтолцоо бүрдүүлж, фронтод байгаа цэргүүд, гадаадад амьдарч буй украинчууд болон байлдааны бүсийн иргэдийн санал өгөх боломжийг шийдвэрлэх хэрэгтэй гэжээ. Украинд 2022 онд ОХУ бүрэн хэмжээний довтолгоо эхлүүлснээс хойш онц байдал буюу дайны дэглэм үйлчилж байгаа бөгөөд энэ нөхцөлд сонгууль явуулахыг одоогийн хууль хориглодог. Зеленскийн ерөнхийлөгчийн бүрэн эрхийн хугацаа 2024 оны тавдугаар сард дууссан ч дайны нөхцөлөөс шалтгаалан сонгууль болоогүй юм.

Федоров Зеленскийг нэрийг нь дурдаж шууд шүүмжлээгүй ч түүний засаглалын бодлогыг ил тод бус, шинэчлэл удааширсан гэж үзсэн байна. Мөн авлига, төрийн удирдлагын үр ашиггүй байдал зэрэг асуудлыг хөнджээ. 35 настай Федоров Батлан хамгаалахын сайдаар ердөө хэдхэн сар ажиллаад өнгөрсөн долдугаар сард албан тушаалаасаа чөлөөлөгдсөн. Түүнийг цэргийн удирдлагатай, тэр дундаа тухайн үеийн Зэвсэгт хүчний ерөнхий командлагч Александр Сырскийтэй санал зөрөлдсөн гэх мэдээлэл гарч байсан. Түүний огцруулалт Киевт эсэргүүцлийн жагсаал өрнөхөд хүргэсэн бөгөөд улмаар Зеленский Сырскийг ч мөн албан тушаалаас нь чөлөөлсөн.

Федоров одоогоор ерөнхийлөгчийн сонгуульд нэр дэвшихээ мэдэгдээгүй. Гэсэн хэдий ч зарим санал асуулгаар тэрбээр Зеленскийтэй өрсөлдвөл өндөр дэмжлэг авах боломжтой байгааг харуулжээ. Энэ нь түүнийг Зеленскийн засаглалын дотоодын хамгийн хүчтэй шүүмжлэгчдийн нэг болгож байна.

Үүний зэрэгцээ Зеленский Батлан хамгаалахын шинэ сайдаар Евгений Хмараг нэр дэвшүүлсэн бөгөөд Украины парламент уг томилгоог хэлэлцэхээр төлөвлөжээ. Федоровын сонгууль явуулах уриалга нь 2022 оноос хойш Украины төрийн дээд түвшний албан тушаалтнаас гарсан дайны үеийн сонгуулийн талаарх хамгийн тод байр суурийн нэг болж, Зеленскийн засаглалын дотоод улс төрийн дарамтыг дахин нэмэгдүүлж байна.

Л.Баяр