Хөлбөмбөгийн супер од Лионель Месси Аргентины шигшээ багийн төлөөх карьераа өндөрлүүлж буйгаа наймдугаар сарын 31-нд албан ёсоор мэдэгдлээ. Ингэснээр тэрбээр эх орныхоо шигшээ багт 20 гаруй жил тоглосон түүхэн замналаа өндөрлүүлж байна.

39 настай Месси энэ шийдвэрээ Instagram хуудсаараа дамжуулан мэдэгдсэн бөгөөд “Шигшээ багаасаа зодог тайлж байгаагаа та бүхэнд хэлэхийг хүсэж байна. Энэ бол надад хүнд туссан, одоо ч сэтгэл өвтгөж байгаа шийдвэр. Гэхдээ цаг нь болсон гэдгийг ойлгож байна” хэмээн бичжээ.

Тэрбээр мөн Аргентины шигшээ багийн өмсгөлийг өмссөн бүх хугацаандаа өөрийн чадах бүхнээ хийсэн гэдгээ онцолсон байна. “Бид сүүлийн жилүүдэд бүхнийг ялж байсан төдийгүй түүнээс өмнө ч би үргэлж тэмцэж, энэ өмсгөлийн төлөө бүхнээ зориулсан. Аргентин хүн гэдгээрээ бахархах, баярлах мөчүүдийг та бүхэнд өгөхийг хүсдэг байсан” хэмээн Месси дурджээ.

Месси Аргентины шигшээ багт 2005 онд анхны тоглолтоо хийснээс хойш нийт 207 тоглолтод оролцож, 125 гоол оруулсан байна. Тэрбээр шигшээ багийнхаа түүхэн дэх хамгийн олон тоглолтод оролцсон, хамгийн олон гоол оруулсан тоглогч юм.

Түүний олон улсын карьерын хамгийн оргил үе нь 2022 оны Катарт болсон ДАШТ байлаа. Аргентины шигшээ баг финалд Францыг торгуулийн цохилтоор хожиж, 36 жилийн дараа дэлхийн аварга болсон бөгөөд Месси тэмцээний шилдэг тоглогчоор шалгарсан юм. Тэрбээр мөн 2021, 2024 оны Копа Америкад Аргентиныг түрүүлэхэд багийн ахлагчийн хувиар чухал үүрэг гүйцэтгэсэн.

Месси 2026 оны ДАШТ-д зургаа дахь удаагаа оролцож, Аргентины шигшээ багийг финалд хүргэсэн ч Испанийн багт хожигдсоноор дэлхийн аваргын цомоо хамгаалж чадаагүй билээ. Энэ тоглолт нь түүний Аргентины шигшээ багийн өмсгөлтэй хийсэн сүүлчийн тоглолт болсон юм. Месси мэдэгдэлдээ цаашид шигшээ багийн тоглолтыг талбайн гаднаас дэмжих болно гэдгээ илэрхийлжээ.

“Багийн нөхдийн хамт бид нэгэн цагт зөвхөн мөрөөддөг байсан мөчүүдийг бүтээж чадсандаа сэтгэл амар, бахархалтайгаар явж байна” хэмээн тэрбээр бичсэн байна.

Месси шигшээ багаас зодог тайлсан ч клубийн түвшинд тоглолтоо үргэлжлүүлнэ. Тэрбээр АНУ-ын MLS-ийн Интер Майами клубт тоглож байгаа юм.

Л.Баяр