Непалын хойд хэсэг болон Хятадын Төвөдийн хил орчимд өнгөрсөн долоо хоногт болсон хүчтэй үер, хөрсний гулгалтын улмаас амиа алдсан хүний тоо 1,000 давлаа. Непалын эрх баригчдын мэдээлснээр тус улсад 987 хүн амиа алдаж, 3,916 хүн сураггүй байна. Харин Хятадын Төвөдийн бүсэд 16 хүн нас барж, 546 хүн сураггүй байгаа аж.

Гамшиг наймдугаар сарын 26-нд Бхоте-Коши голын сав газарт эхэлсэн бөгөөд мөсөн голын нуранги, их хэмжээний ус, чулуу, шавар уулын хөндийгөөр асар хурдтай уруудан урссанаар хэд хэдэн суурин болон дэд бүтцийг сүйтгэжээ.

Аврах ажиллагаа өнөөдөр долоо дахь өдрөө үргэлжилж байна. Зам, гүүр олноороо эвдэрсэн ч аврагчид алслагдсан бүсүүдэд түр гүүр байгуулан хүрч, нуранги дороос хүмүүсийг хайж байна. Непалын Ерөнхий сайд Балендра Шахын мэдээлснээр 11 мянга гаруй хүнийг авран нүүлгэсэн байна.

Гамшгийн бүсийн хэд хэдэн усан цахилгаан станц аврах ажиллагааны гол цэг болоод байна. Одоогоор ойролцоогоор 600 хүн усан цахилгаан станцуудын орчимд гацсан хэвээр байгаа бөгөөд зарим ажилчин газар доорх хонгилд дарагдсан байж болзошгүй гэж үзэж байна.

Мөн Непалд сураггүй болсон хүмүүсийн дунд 583 гадаадын иргэн байгаа талаар эрх баригчид мэдээлжээ. Энэтхэг улс иргэдээ нүүлгэн шилжүүлэх ажиллагаанд оролцож, Өмнөд Солонгос 44 хүний бүрэлдэхүүнтэй гамшгийн тусламжийн баг илгээхээр болсон байна.

Мэргэжилтнүүд Гималайн бүсийн мөсөн голын тогтворгүй байдал, уур амьсгалын өөрчлөлтөөс шалтгаалсан эрсдэл нэмэгдэж байгааг анхааруулж байна. Непалын эрх баригчид гамшгийн дараах сэргээн босголтод олон улсын дэмжлэг шаардлагатай байгааг мэдэгдээд байна.

Л.Баяр