БНЭУ-д Монгол Улсын 500 гаруй иргэн эрсдэлтэй нөхцөлд байгаа билээ. Тус улсад коронавирусний халдвар эрчимтэй тархахын сацуу хоол хүнсний хомсдол үүсээд буй. Түүнчлэн энэтхэг иргэдийн дунд арьс өнгө, шашин шүтлэгээр бусдыг гадуурхах үзэгдэл мэр сэр гарах болсон байна. Манай улсын зүгээс тус улс дахь иргэдээс илүү БНСУ болон АНУ, Австрали, Герман зэрэг улсад байгаа иргэдийг эрсдэлтэй нөхцөлд байна гэж үзэж буй. Тэгвэл дээрх 500 гаруй иргэдийн дунд хавдрын эмчилгээ болон Монголд хийгддэггүй мэс засал хийлгэхээр 2-50 насны 20 гаруй иргэн байгаа юм. Харин бусад иргэдийн хувьд тэнд суралцдаг оюутан болон аялалаар очсон цөөн тооны иргэн хөл хорионд ороод буй юм.

Эмчилгээнд орсон иргэдийн хувьд буудлын давчуу өрөөнд өндөг, будаагаар амь зогоох болоод нэг сар гаруйн хугацаа болж байна.

Энэтхэгийн зүгээс халдварын тархалтыг барьж чадаж байгаа гэж мэдэгдсэн ч олон улсын судлаачдын зүгээс ядуусын хороолол дахь халдварын тархалт болоод оношилгоог бүрэн хийж чадахгүйг байгааг онцолж буй. Энэ утгаараа тус улс нь эрсдэлийн зэрэглэлээрээ Африкийн улс орнуудын дараагаар жагсаж байна.

Тус улсад суугаа Элчин сайд Г.Ганболдын зүгээс санхүүгийн хүндрэлд орсон иргэдэд санхүүгийн тусламж үзүүлэх хүсэлтийг Гадаад харилцааны яаманд уламжилсан байна.

Уг хүсэлтийг салбар яамнаас хүлээн авч мөнгөн дэмжлэг үзүүлэхээр болжээ. Одоо гагцхүү иргэдэд хэдэн төгрөгийг яаж хүргэх талаарх арга хэмжээ авах үлдээд байгаа аж.

Тэгвэл үүнээс гадна нэгэн сайхан мэдээ бидэнд ирлээ. Энэ нь “Хүннү Эйр” авиакомпани Энэтхэг улс руу чартер онгоц нисгэх боломжтой гэдгээ уламжилжээ. Тодруулбал, Энэтхэг-Монголын Эрүүл мэндийн хамтын ажиллагааны төвөөс хэд хэдэн авиа компанид Дели рүү нислэг үйлдэх санал тавьсан бололтой. Энэ саналыг "Хүннү Эйр" компани хүлээн авч албан бичиг ирүүлсэн байна. Уг албан хүсэлтийг энэ сарын 24-нд Улсын онцгой комисст уламжилжээ.

Харамсалтай нь, УОК-оос МИАТ компанийн тогтмол нислэг үйлддэггүй чиглэлд онгоц хөөргөхгүй гэдэг чиглэл баримталж байгааг албаны эх сурвалж хэллээ.

Хэрвээ энэ үнэн бол МИАТ компани монополь эрхээ хамгаалах гэсэн үйлдэл үү, эс бөгөөс энэтхэг дэх иргэдийг эрсдэлгүй орчинд байна гэж УОК дүгнэж буй хэрэг үү гэдгийг асуухаас өөр замгүй.

ГАНДАНТЭГЧИЛЭН ХИЙД 200 ЛАМХАЙГ ТУСГААРЛАХ БАЙРААР ХАНГАХ БОЛОМЖТОЙ

Тус улсад 18 хүртэлх насны 260 гаруй ламхай бий. Тэдгээрийг Монгол буцах хүсэлтээ цуцалсан гэсэн мэдээллийг Элчин сайд Г.Ганболд өгсөн ч тэрбээр энэ мэдэгдлээ залрууллаа. Учир нь лам нарыг хариуцаж байгаа хүмүүс албан мэдээ дамжуулахдаа ойлголцлын зөрүү үүсгэсэн байна. Тиймээс дээрх 260 гаруй ламхай нараас гадна 18 наснаас дээш насны 20 гаруй лам буцах хүсэлтээ уламжилжээ. Тэгвэл гаднаас ирсэн иргэдийг тусгаарлах боломж, тэднийг эмчлэх эмч, эмнэлгийн ажилчдын хүрэлцээ тааруу байгааг УОК-оос мэдэгдсэн. Харин Гандантэгчилэн хийдээс дээрх 260 гаруй ламхай нараас 200-г нь тусгаарлах байр бэлэн байгааг энэтхэгийн талд уламжилжээ. Энэ утгаараа тусгай үүргийн онгоц хөөргөвөл ламхай нарыг тусгаарлах байранд нэг их санаа зовох хэрэггүй бололтой.

Ламхай нарыг авчрахаас гадна хавдрын болон мэс засал хийлгэсэн, хавдрын эмчилгээ хийлгэсэн 20 орчим иргэнийг яаралтай авчрах нэн шаардлага үүсээд буй.

Учир нь тус улсад хоол хүнсний хомсдол үүссэнээс болж эдгээр иргэд тэнхэрч чадахгүй биеийн байдал улам муудаж байгааг ар гэрийнхэн нь бидэнд уламжилсан юм. Тэгээд ч коронавирусний халдвараар дархлалын систем тааруу, эмгэг өвчтэй, мэс засал хийлгэсэн хүмүүс халдварлах эрсдэл өндөр гэдгийг ДЭМБ-аас мэдэгдсэн. Энэ утгаараа нэн яаралтай авчрах иргэдийн жагсаалтад эдгээр хүмүүс багтах нь лавтай.

"ХҮННҮ ЭЙР" КОМПАНИ: БИД ЧАРТЕР ОНГОЦ НИСГЭХ БОЛОМЖТОЙ

Тус компанийн хувьд 98 зорчигчийн суудалтай онгоц хөөргөх боломжтой юм байна. Үүнээс онгоцны баг, тусгай үүргийн алба хаагчид зэргийг оролцуулаад энэтхэгийн талаас нийт 88 зорчигч авчрах боломжтой гэдгээ УОК-т хүргүүлсэн албан бичигтээ дурджээ. Харин Энэтхэгийн талаас агаарын замаа нээж өгөхөөс эхлээд шаардлагатай зүйлсээр дэмжиж ажиллах боломжтой гэсэн мэдээллийг БНЭУ-аас Монгол Улсад суугаа Онц бөгөөд Элчин сайд мэдэгдсэн байна. 

Энэ талаар тус компанийн Гадаад харилцааны албаны дарга Д.Мөнхсүхээс тодрууллаа.

-Тусгай онгоц хөөргөх боломжтой хүсэлтээ хэзээ хүргүүлсэн юм бэ?

-Энэ сарын 24-нд Энэтхэг-Монголын хамтын ажиллагааны төвөөр дамжуулж Шадар сайд Ө.Энхтүвшинд уламжилсан. Хэрвээ УОК-оос шаардлагатай арга хэмжээ, зохион байгуулалт авч хэрэгжүүлбэл онгоц хөөргөхөд бэлэн. Зөвшөөрөл өгвөл дипломат шугмаар нислэгийн зөвшөөрөл гурав хоногийн дотор авах боломжтой. Нисэх боломжтой өдөр нь лхагва, бямба гараг гэж саналдаа дурдсан.

-Танайд үүнээс илүү том онгоц байдаггүй байх аа?

-Боломжтой онгоц нь Embraer E190.

-Тийзний үнэ хэд орчим болох бол?

-Яг нарийн хэлэх боломжгүй. Учир нь зөвшөөрөл өгвөл аль агаарын замаар нисэх вэ гэдгээс эхлээд замдаа хаана зогсож, шатахуун цэнэглэх бэ гэдгээ хөөцөлдөнө. Үүнээс хамаарч тийзний үнэ хамаарна. Нэг их үнэтэй тусахгүй байх.

-Үнэтэй биш гэхээр хэд орчим бол?

-Яг нарийн хэлж чадахгүй байна. Нэг талдаа хоосон ниснэ шүү дээ. Бид нийгмийн хариуцлагын хүрээнд ийм шийдвэр гаргасан. Хамгийн ихдээ 1000  орчим ам.доллар орчим болох болов уу. Гол нь аль улсад түр зогсолт хийж, шатахуун цэнэглэлт хийх бэ гэдгээс их зүйл шалтгаална. Вьетнам, Казахстан, БНХАУ зэрэг улсын аль нэгэнд түр зогсолт хийж магадгүй. Улс орон бүрийн нөхцөл байдал хэцүү байна. Ийм үед аль нь зөвшөөрөх эсэхээс хамаарч агаарын замаа тодорхойлно.

-Чартер хөөргөх бол Делид газардана гэсэн үг үү?

-Тийм. Энд нэг зүйл хэлэхэд жижиг онгоцоор иргэдээ авчрахын нэг давуу тал нь тусгаарлах байрны хүрэлцээ тааруу байгаа энэ үед ачааллыг тэнцвэржүүлэх сайн талтай. Хэрвээ боломжтой гэвэл долоо хоногт нэг удаа эсвэл 14 хоногт нэг удаа нислэг үйлдэх боломжтой.

Г.Нацаг-Эрдэнэ