“Шинэ үе” продакшны жүжигчин, СТА Х.Отгонтунгалагтай сүүлийн үеийн уран бүтээлийх нь талаар ярилцлаа. Тэрбээр “Фантастик” продакшны шинэ уран бүтээл болох “Зура 2: Цурам ажиллагаа” киноны гол дүрд тогложээ.

-Бидний урилгыг хүлээж авсанд баярлалаа. Юун түрүүнд сүүлийн үеийн уран бүтээлээс яриагаа эхэлье. “Фантастик” продакшны уран бүтээл “Зура 2: Цурам ажиллагаа” киноны эмэгтэй гол дүрд тоглосон байсан. Энэ талаараа хуваалцаач?

-Сайн байцгаана уу. Уншигчдадаа энэ өдрийн мэнд хүргэе. Миний хувьд кино зураг авалттай завгүй өдрүүд их байлаа. 2022 ондоо дэлгэцийн хоёр уран бүтээлтэй үзэгчидтэйгээ уулзах гэж байна. Эхнийх нь "Боловсрол" телевизийн олон ангит уран сайхны кинонд тоглосон бол түүний дараа “Фантастик” продакшны шинэ уран бүтээлд голд тоглосон. Энэ хоёр бүтээл маань тун удахгүй нээлтээ хийх гэж байна.

-Тун удахгүй “Зура 2: Цурам ажиллагаа” киноны гол дүрийн эмэгтэй болох Сарнайгийн дүрээр таныг харах нь. Анх кинонд тоглох саналыг хэн тавьсан бэ?

-Энэ кинонд тоглохын өмнөхөн олон ангит киноны зурагтай, арай дуусаагүй байж таарсан. Тухайн үед "Фантастик" продакшнаас шинэ кинонд тоглох санал ирж, би энэ саналын маш их баярлаж хүлээж авсан. Яагаад гэвэл "Фантастик" продакшны хамт олон дэлгэцийн уран бүтээлээрээ дээгүүрт бичигддэг. Магадгүй "Фантастик"-ийн уран бүтээлд тоглох юмсан гэж боддог олон хүн байдаг байх. Би ч тэдний нэг байсан. Ингээд надад санал тавихад маш баяртайгаа хүлээж авч, хоёр талын кино групптэйгээ ярилцаж байгаад зураг авалтын өдрүүдээ зохицуулсан. Анх очоод зохиолоо уншаад, дүрийнхээ талаар сонсоод маш их баярласан. Учир нь надаас маш ондоо, тэс өөр дүр байсан. Түүнээс гадна ур чадвар шаардсан, үнэхээр тоглолттой дүр байсан.

Х.Отгонтунгалаг: Нөхөртэйгөө хамт тоглосон анхны кино байлаа

-Таныг "Цурам ажиллагаа" кинонд нөхөртэйгөө хамт тоглосон гэж сонссон. Хамтдаа нэг кинонд тоглоход ямар байсан бэ. Хамт тоглосон анхны уран бүтээл байсан уу?

-Тийм ээ. Бидний хамтдаа тоглосон анхны кино. Өмнө нь 2,3 кинонд хамтдаа тоглох санал ирж байсан хэдий ч яагаад ч юм боломж гарахгүй байсан. Харин энэ кинонд бид нэг ч зураг авалтад хамт байдаггүй. Дандаа тус тусдаа тоглосон. “Зура 2: Цурам ажиллагаа” киноны триллер цацагдсанаас хойш хүмүүс нэг зүйлийг их асууж байгаа. Эхнэр нөхөр хоёр нэг кинонд тоглосон ч гэсэн би өөр хүний эхнэрийн дүрээр тоглож байгаа. Бас эротик хэсэгтэй. Тийм болохоор нөхөр чинь юу гэж хүлээж авч байна, нөхөр нь зүгээр үү гэсэн асуулт их ирсэн. Бид уран бүтээлч гэр бүл. Манай нөхөр тэр тал дээр уурлах, дургүй хүлээж авах зүйл байгаагүй. Харин ч намайг илүү их дэмжсэн. Зохиолоо уншиж үзээд “энэ маш гоё тоглолттой дүр байна, чи чадахын төлөө хичээ, ичих биш харин ч зоригтой байвал үзэгчдэд хүрнэ” гэж хэлээд урам өгч энэ кинонд оруулсан.

-Сарнайгийн дүр таны өмнөх дүрүүдээс ялгаатай харагдсан. Өөр төрөл жанрын, action кинонд тоглоход ямар байв?

-Миний хувьд action төрлийн кинонд анх удаа тоглож байна. Сарнайгийн дүрийн хувьд бүх хэсэг хүнд тоглолттой байсан. Тэр бүрт хичээж, чадах чинээгээрээ өөрийгөө дайчилж тоглосон.  

-"Фантастик" продакшнтай хамтарч ажиллахад ямар байсан бэ. Хэрэв дахин боломж олдвол хамтрахад бэлэн үү?

-Хамтарч ажиллахад маш гоё хамт олон. Тэднээс суралцах зүйл их байлаа. Миний хувьд энэ кинонд Барсаатай хамтрагч болж тоглосон. Хамгийн сүүлийн зураг авалтын дараа би Барсааг аргагүй л мөнгөн модны эзэн, маш сайн, чадварлаг тоглолттой жүжигчин юм аа гэсэн бодолтой зураг авалтаа дуусгасан. Түүнээс суралцах зүйл их байлаа. "Фантастик"-ийн залуус бүгд өөр өөрийн ажлаа яс хийдэг, хурдтай, үнэхээр ажилдаа мэргэшсэн хамт олон гэж хэлнэ. Тиймээс би чирэгдэж болохгүй, дагаад л гүйх ёстой. Үнэхээр ингэж ажилладаг болохоор л чанартай уран бүтээл гардаг юм байна гэсэн сэтгэгдэл өөрийн эрхгүй төрсөн шүү.

-Киноны зураг авалтын үеэр Б.Тамир найруулагчийн зүгээс дүр дээр ажиллахад ямар шаардлага тавьж байв?

-Анх айдастай орсон. Би энэ дүрийг чадах болов уу яах бол, загнуулахвий дээ гэсэн бодолтой ирж байлаа. Гэхдээ зоригтой байж өөртөө итгэлтэй байж байж үзэгч итгэнэ шүү дээ. Б.Тамир найруулагчийн хувьд жүжигчидтэйгээ их зөв харьцдаг юм байна гэж бодсон. Эхний зураг авалт дээрээс эхлээд жүжигчидтэйгээ ярилцаж байсан. Чи энийг юу гэж бодож байна, ингэвэл яах уу, ингээд нэг үздээ гэх мэтчилэн зөвлөж, ярилцсаны үндсэнд дүрээ гаргаж байгаа нь зөв санагдсан. Яагаад гэвэл зохиолоо бичсэн хүн тэр дүрийг дотроо харчихсан байгаа. Гэтэл жүжигчин бас нэг өөрөөр хардаг. Тиймээс хоорондоо ярилцаж дүрээ гаргаж ирж байгаа нь үнэхээр мундаг байсан.

-"Цурам ажиллагаа" киноны жүжигчдийн бүрэлдэхүүнийг харахад чадварлаг, том баг гарчээ гэж харсан. Таны хувьд, энэ кинонд тоглосон хүний хувьд юу гэж харж байна вэ?

-Тийм шүү. Монголын хит болсон жүжигчид болох С.Ариунбямба ах, Ш.Доржсүрэн ах, С.Болд-Эрдэнэ ах нар тоглосон. Мөн дээрээс нь "Фантастик"-ийн чадварлаг жүжигчид нэгдсэн хүчирхэг бүрэлдэхүүнтэй багаас бүтсэн. Өөрөө тэдний нэг эд, эс нь болж ажиллахдаа догдолж байлаа. Тэдний ур чадварыг хараад биширсээр байгаад зураг авалтаа дуусгасан.

-Хэрэв та үзэгч байсан бол яагаад "Цурам ажиллагаа УСК-г сонгож үзэх байсан бэ?

-Яагаад гэвэл энэ кинонд олон шинэлэг зүйл байгаа. "Фантастик" продакшны хамт олон маань өмнөх уран бүтээлүүдээсээ давуулж хийнэ гэсэн зорилготой ажилласан. Жишээлбэл, камер, тоног төхөөрөмж гэхэд л сүүлийн үеийн загвар байх жишээтэй.

-Яагаад анх жүжигчин мэргэжлийг сонгох болсон бэ. Та хэн багшийн шавь байв?

-Би 2011 онд КУДС-ийг жүжигчний мэргэжлээр төгссөн. Дунд сургуулиа төгсөхдөө хөтлөгч болно гээд шийдчихсэн байсан. Ингээд КУДС-ийн сэтгүүлчийн ангид нэг жил сураад төгсөхийн өмнө жүжигчний анги руу шилжиж С.Болормаа багшийн ангид орсон. Манай ангийнхан одоо ихэнх нь мэргэжлээрээ ажиллаж байна. Жишээлбэл, “Этик” продакшны захирал А.Энхжин, Тоонотын Jason буюу Б.Баяржавхлан бид нэг анги. Мөн ангийнхан маань театрт, урлагтаа ажиллаж байгаа.

-Хэрэв багадаа сонгосон мэргэжлээрээ ажилласан бол одоо та хаана байх байсан бэ?

-Миний багадаа мөрөөддөг байсан мэргэжлүүд маш олон солигдсон. Бүр багадаа биеийн тамирын багш болно гэж боддог байлаа. Тэр үедээ, гүйж харайх дуртай, сунгалттай, спортлог хүүхэд байсан юм. Харин дунд сургуульд ороод сургуулийнхаа бүх л урлагийн үйл ажиллагаанд оролцож эхэлсэн. Нэг удаа сургуулийнхаа үйл ажиллагаанд хөтлөгч хийсэн. Түүнээс хойш хөтлөгч болно гэж боддог болсон. Гэхдээ би жүжигчин болоогүй байсан бол бүжигчин болох байсан байх аа. КУДС-д байхад Н.Эрдэнэцэцэг багш маань “чи төрөлхийн подъемтой, уян хатан биетэй юм байна” гэж байсан. Жүжигчний мэргэжлээр сурч байхдаа багш дээрээ бүжгээр хичээллэж, сургуулийнхаа тэмцээн уралдаанд ороод л явдаг байсан.

"Нээлтийн өдөр багштайгаа цуг суугаад киногоо үзнэ гэхээс айдастай байна" 

-Та С.Болормаа багшийнхаа талаар хуваалцаач. Анги удирдсан багш нь байсан байх аа?

-Тийм ээ. Сугарын Болормаа багш маань агуу хүн. Биднийг маш эмх цэгцтэй, диктатуртай сургасан. Хамгийн түрүүнд манай ангийнхан сургууль дээрээ ирээд бүр орой хүүхдүүд тарсны дараа тардаг байлаа. Энэ хугацаанд багш маань шал арчиж байгаа хүнийг хүртэл хүндэл гэж сургасан. Бид хүн байх, хамт олонтой байх гэдгийг сурсан. Багш маань сая докторын зэрэг хамгаалсан, одоогоор СУИС-д багшилж байна. "Зура 2: Цурам ажиллагаа" кинондоо С.Болормаа багштайгаа хамт тоглосон. Гэхдээ бас л бид хоёр нэг хэсэгт хамт тоглоогүй.

-Багшийнхаа заасан ур чадварыг эзэмшээд, хамтдаа нэг кинонд тоглоод эргээд 11 жилийн дараа багшийнхаа нүдэн дээр би ийм жүжигчин болсон гэдгээ харуулах таны хувьд ямар байв?

-Нэг л зүйлээс айж байна. Киноны нээлтийн өдөр С.Болормаа багштайгаа цуг суугаад киногоо үзнэ, юу гэж хэлэхийг нь мэдэхгүй байна. Багш маань биднийг үргэлж илүү байхыг хүсдэг. Илүү хичээж, илүү дэвших ёстой гэдэг. Тийм болохоор энэ дүрээ багштайгаа цуг үзнэ гэхэд айдастай байна.

-"Зура" төсөл үргэлжилнэ гэсэн. Магадгүй дараагийн ангид та байх болов уу?

-Тэрийг Б.Тамир ах л шийдэх байх даа. 

-Өөрийн тань бүтээсэн дүрүүдээс хамгийн хайртай дүрээ нэрлэвэл?

-Шинэ үе продакшны бүтээл “Хөгжилтэй өдөр” УСК-ны гол дүрдээ хайртай. Анхны маань гол дүр байсан. Тэр үед анхны хүүхдээ төрүүлээд нялх биетэй байхдаа тоглосон.

"Сарнайгийн дүрээ өөртөө зохиулах гэж хичээлээ"

-Түүний дараа хамгийн ур чадвар шаардсан, тоглолттой дүр ямар уран бүтээлийн дүр байсан бэ?

-Энэ жилийн хоёр киноны дүр хоёулаа ур чадвар шаардсан, тоглолттой дүрүүд байсан. Өмнө хэлсэнчлэн "Цурам ажиллагаа" киноны дүр бол бүх хэсэгт хүнд тоглолттой, чи чадвал чад гэсэн дүр. Нөгөөх нь "Боловсрол" телевизийн олон ангит киноны эсрэг дүр. Энэ хоёр кино их чансаа шаардлаа, бас хичээж ажиллаа.

-Чансаа шаардсаны хэрээр та үүнээс цаашхыг ч би чадах юм байна гэсэн бодол төрж байв уу?

-"Цурам ажиллагаа"-ны зураг авалт дуусаад дутуу явчихсан ч юм шиг бодогдох үе байсан. Жүжигчин хүн бүрт ийм бодол төрдөг байж магадгүй. Дараа нь ийм үед ингэж тоглоно доо, ингэсэн бол илүү дээр ч байсан юм уу гэсэн бодол төрсөн шүү. Гэхдээ өөрийнхөө тоглолтод сэтгэл хангалуун байгаа. Энэ бүгд миний хувьд туршлага болж байна.

-Танд эсрэг дүр зохихоор байна уу?

-Өөртөө зохих биш зохиулах гэж үзлээ. Энэ дүрийг Отгонтунгалаг биш Сарнай гэдгээр нь хүмүүст харуулахыг зорьсон.

-Жүжигчин Х.Отгонтунгалаг амьдрал дээрээ яг ямар хүн бэ?

-Би өөрийгөө хөдөлмөрч хүн гэж хэлнэ. Үүнийг маань С.Болормаа багш маань, мөн Шинэ үе продакшны хамт олон маань надад суулгасан. Бооёо ах маань энэ дүрийг чи чад, чадвал тайзан дээр гарна гэж зааж өгсөн. Тийм ч учраас дүр дээрээ сайн ажиллавал тайзан дээр гарна гэж хөдөлмөрлөж, хичээж дүр дээрээ ажилладаг байсан. Мөн аз жаргалтай, үргэлж инээж явахыг эрхэмлэдэг. Би найман хүүхэдтэй айлын отгон хүүхэд. Багаасаа олуулаа өссөн болоод ч тэр үү одоо цөөхүүлээ байхыг хүсдэггүй. Олон дундаа, олуулаа байхад дуртай. Ер нь ганцаараа байх дургүй төрлийн хүн.

"Шинэ үед орсноор миний амьдрал өрнөж эхэлсэн"

-“Шинэ үе” продакшнд орсон түүхээсээ хуваалцвал?

-Би их азтай хүн. Хоёр тоглолт яваад Шинэ үе продакшны гэрээт жүжигчин болсон. Тухайн үед манай продакшнд орох, жинхлэгдэх хүсэлтэй маш олон хүүхдүүд байсан. Тэр дундаас жинхлэх эсэх нь удирдлагуудын шийдвэр. Ингээд манай ангийн А.Энхжин бид хоёр жинхлэгдэж байсан. Түүнээс хойш "Шинэ үе" продакшндаа 11 жил зүтгэсэн байна. Продакшндаа ороод нэг жилийн дараа удалгүй нөхөртэйгөө танилцаад ахиад нэг жилийн дараа бид хүүхэдтэй болсон. Шинэ үед орсноос хойш миний амьдрал өрнөж эхэлсэн.

-Таны нөхөр мөн жүжигчин хүн байдаг. Анх яаж танилцаж байсан бэ?

-Анх талийгч Р.Алтансүх /Аси/ ах маань "Хунгийн сүүлчийн дуу" гэдэг кино хийгээд манай продакшны залуу жүжигчид нэг хэсэгт тоглохоор болсон юм. Тэнд нөхөр маань бас дадлага хийгээд кинонд явж байж таарсан. Ингээд л бид танилцаж гэр бүл болсон доо.

-Нэг гэрт урлагийн хоёр хүн байх ямар байдаг вэ. Гэр бүлдээ хангалттай цаг зав зарцуулж чадаж байна уу?

-Маш гоё. Үүнийг би хаана ч хэлнэ. Магадгүй өөр мэргэжлийн хүнтэй гэр бүл байсан бол өдийд энэ зэрэгтэй явах байсан үгүйг хэлж мэдэхгүй. Нөхөр маань намайг бүх үед 100 хувь дэмждэг. Ингэж дэмждэг  нөхөртэй байна гэдэг маш том давуу тал гэж хамт олон маань хүртэл байнга хэлдэг. Өмнө хэлсэнчлэн 20 ангитай олон ангит киноны зураг авалт дуусаад шууд дараагийн кинондоо орсон болохоор 5-6 сар амралтгүйгээр ажилласан. Энэ үед ар гэрийнхээ ажлыг сайн дааж, хойшоо санаа зовох зүйлгүй байлгасан.

-Та өөрийнхөө амьдралыг ямар нэг зүйлтэй зүйрлэвэл юу байх байсан бол?

-Би амьдралыг тааварлашгүй зүйл гэж хэлнэ. Өдөр бүр шинэ байдаг. Маргааш юу болохыг хэн ч мэдэхгүй шүү дээ. Амьдрал өөрөө шинэлэг, содон, адармаатай. Тиймээс би тааварлашгүй гэж хэлнэ.

-Бидний урилгыг хүлээж авч ярилцсанд баярлалаа. Таны уран бүтээлийн ажилд амжилт хүсье.

Т.Мөнхжаргал