"Есдүгээр сарын 1-н" хичээлийн шинэ жилийн нээлтэд Ерөнхийлөгчийн соёл, шашны бодлогын зөвлөх Д.Бум-Очир оролцож, "Чингис хаан ба Монголын их амар амгалан" сэдвээр хичээл орлоо. 

Хичээлийг ингэж нэрлэсэн учир шалтгааныг тэрбээр "Бидний өвөг дээдэс зөвхөн дайн байлдаан хийж байгаагүй. Маш олон зөрчил тэмцлийг зогсоон амар амгаланг бий болгож, хүн төрөлхтний хөгжил хурдсахад том хувь нэмрээ оруулсан. 

Чингис хаан эзэнт гүрэн байгуулсны үр дүн нь Евро Азийг бүрхсэн газар нутагт амар амгаланг тогтоосон явдал юм.

Дэлхийн хамгийн анхны амар амгаланг Ромын эзэнт гүрэн бий болгосон. Үүний дараагийн амар амгаланг бидний өвөг дээдэс дэлхий дээр тогтоосон.

Дэлхий дахиныг амар амгалан болгосон үндэстэн маш цөөхөн байдаг гэдгийг зөвхөн бид ярьж байгаа хэрэг биш НҮБ хүртэл хүлээн зөвшөөрсөн.

Чингис хааны хөргийг залах тухайд хувь хүн бүр өөрийн гэсэн үнэт зүйлтэй. Бидний нэгдсэн үнэт зүйл бол түүх болон өвөг дээдэс минь юм. Энэ нэгдсэн үнэт зүйл биднийг нэг ард түмэн болгож байгаа.

Дэлхийн түүхэнд ямар хувь нэмэр оруулсан гэдгийг та бүхэн мэдэж байх хэрэгтэй. Монголын ард түмнийг нэгтгэдэг олон үнэт зүйлийн нэг нь Чингис хаан болон түүний залгамжлагчдын байгуулсан Монголын эзэнт гүрний хүн төрөлхтний түүхэнд оруулсан хувь нэмэр юм. Тиймээс Монгол Улсын Ерөнхийлөгч Чингис хааны хөргийг айл, албан байгууллага бүр залах зарлиг гаргасан" гэв.