УИХ-ын гишүүн асан Ж.Батзандан мэдээлэл хийлээ.

Тэрбээр "2019 онд 50 мянган залуус “МАНАН дэглэмийг устгаж Монголоо шинэчилье” гэдэг уриатай тэмцэж Сүхбаатарын талбайд жагссан. Тэд Ерөнхий сайд асан У.Хүрэлсүх, Ерөнхийлөгч асан Х.Баттулгаас, одоогийн Ерөнхий сайд Л.Оюун-Эрдэнэ, УИХ-ын дэд дарга Т.Аюурсайхан, Хууль зүйн сайд Х.Нямбаатар, тухайн үед УИХ-ын гишүүн байсан. Болд, Ж.Батзандан нараас юу хүсч өвлийн хүйтэнд жагсаж байсныг бид мартах ёсгүй. Бидэнтэй хамт тэмцэж байсан нөхөд маань бүгд Төрийн ордон дотор дулаан оффистоо тухлан сууж байгаа. Зарим нь том дарга болоод ярьж байсан зүйлээ мартаж хамт тэмцэж явсан нөхдөө шорон, гяндангаар айлгадаг болсон байна.

Бид хэн нэгэнтэй муудахыг хүсэхгүй байна. Ялангуяа том дарга нараас айж байна. Гэхдээ тэдэнд өдөр бүр, Монголын ард түмэн юу хүсэж байгааг сануулж, шаардахын тулд “Шинэ хувьсгал” хөдөлгөөнийг албан ёсоор байгуулж байна.

Өнөөдөр иргэд Монголоос дүрвэж, авлигачид шоронгоос гараад Сингапурлуу зугтаж, зарим офшорчдын хэргийг хэрэгсэхгүй болгож байна. Бид гурван жилийн өмнө ингэж амласан билүү.

Би хэвлэлийн хурлаар дамжуулж Ерөнхийлөгч У.Хүрэлсүхэд хатуухан үг хэлсэн. Монголын төр сөрөг хүчингүй болоод удаж байна. Эрх баригч нам атар онгон, ардаг зэрлэг болжээ. Хатуу шүүмжлэл хэлэхэд “ална шүү, ах нь чамд бяраа үзүүлнэ шүү” гээд мессеж явуулж байх жишээтэй. Одоо сөрөг хүчний дуу хоолойг “Шинэ хувьсгал” хөдөлгөөнөөр босгоно. Бидний байр суурь, нам, нутаг ус харгалзахгүйгээр эх орноо аваръя гэдэг үзэл санаанд нэгдэнэ. МАН дотор ч зөв хүмүүс олон бий. Эрх мэдэлд очоод толгой нь эргэсэн хүмүүс ч удахгүй зөв талдаа, эх орноо гэсэн сэтгэлтэй буцаж ирэх байх хэмээн найдаж байна.

Өчигдөр болсон хэвлэлийн хурлын дараа шөнийн 00:00 цагт Ерөнхийлөгч У.Хүрэлсүхийн зөвлөх, дотны найз, миний ах Ж.Бат-Эрдэнэ Авлигатай тэмцэх газар баривчлагдлаа. Тэд 2018, 2019 онд үй зайгүй найзууд байсан. У.Хүрэлсүхийг 93 хувиар ялуулсан Сүхбаатар аймгийн МАН-ын хорооны дарга бол Ж.Бат-Эрдэнэ. Энэ хоёр хүн хоорондоо ямар дотно, ойрхон гэдгийг би мэднэ.

Ерөнхийлөгчид хандаж хэлье. Дүүтэй нь муудчихаад ахыг нь шоронд хорьдгоо одоо боль. Хүүхэдтэйгээ муудчихаад авгайгаа зоддог шиг битгий аашил. Би таныг ядарч явахад тусалж явсан. Таныг өөрөө өөрийгөө чагнасан гэдэг хэрэгт холбогдчихоод Б.Хурц, Н.Ганболд Цагдаагийн ерөнхий газрын дарга нар таныг эрүүгийн хэрэгт татах гэж байхад би өмөөрч явлаа. 2018 онд Миеэгомбийн бүлэглэл таныг унагах гээд дайрч байхад Ерөнхийлөгч асан Х.Баттулга бид хэд таныг “Миеэгомбын бүлэглэлийг бодвол арай шударгадуу юм даа, энэ залууг дэмжээд аваад үлдье” гэж АН-ын гурван гишүүн дэмжиж таны Засгийн газрыг авч үлдэж байлаа. Та Монголын ардиргэдэд амласан амлалтынхаа төлөө явах уу, бидэнтэй хүчээ нэгтгээч гэж хүсэж байна. Өөрийнхөө дэд сайд найзыг шоронд явуулна уу, шонд өлгөнө үү таны асуудал. Ж.Бат-Эрдэнэ гэдэг хүн танай намыг бага хурлын гишүүн. Тэгэхээр тэр хүнийг яах нь миний асуудал биш" гэв.

М.Сүхэхэй