Төрийн ордонд УИХ-ын дарга Г.Занданшатар, УИХ-ын Төсвийн байнгын хорооны дарга Г.Тэмүүлэн, Сангийн сайд Б.Жавхлан, Засгийн газрын ХЭГ-ын дарга Д.Амарбаясгалан нар оролцож, Монгол Улсын 2023 оны Төсвийн тухай хууль болон бусад асуудлаар мэдээлэл хийж байна. Энэ үеэр УИХ-ын гишүүн Г.Тэмүүлэн мэдээлэл өглөө.

Тэрбээр  "Төсвийн тухай хуулиуд өнгөрсөн баасан гарагт батлагдсан. Энэ хуулиудыг дагалдаж Засгийн газраас 99 хууль, зургаан тогтоолыг өргөн барьсан. 2023 оны төсөв УИХ-аар батлагдсантай холбогдуулан хэд хэдэн бодлогуудыг гаргаж ажилласан. Үүнд нэгдүгээрт, төсөвт суугдсан байсан зардлуудыг бууруулах арга хэмжээ авсан. Энэ хүрээнд төсвийн алдагдлыг бууруулж, төсвийн тэнцлийг сайжруулах бодлогыг баримталсан. Төсвийн алдагдлыг бууруулсан болон хэмнэсэн зардлын эх үүсвэрээр тухайн нийгэмд хүлээлттэй байгаа асуудлуудыг шийдвэрлэх бодлогыг баримталсан. Үүнд эрчим хүчний тарифын хөнгөлөлтийн асуудлыг, улсын хэмжээнд 10 мянгаас дээш хүн амтай хотод эдгээр хөнгөлөлтийг эдлүүлэх санхүүжилтийг УИХ-аас бүрэн шийдвэрлэсэн. Мөн Хүнсний аюулгүй байдал, хангамжтай холбоотой Ерөнхийлөгчийн эхлүүлсэн үндэсний хөтөлбөр болон тэрбум мод хөтөлбөрийн дэмжихэд эрх онуудад шаардлагатай байгаа санхүүжилтүүдийг шийдвэрлэхэд УИХ-ын зүгээс ажилласан.

Эдгээр бодлогуудаас гадна төсвийн хүрээнд тодорхой хэмжээний шинэчлэл, реформын эхлэлийг тавьсан. 2023 оны төсвийг дагалдаж гарах тогтоолуудын хэмжээнд хэд хэдэн эрх зүйн шинэчлэлүүдийг баталсан.

Төрийн өмчит компаниудын ил тод байдал, засаглалыг нь сайжруулахаар тогтоол гаргасан. Цаашдаа нэгдсэн цахим, бүртгэл мэдээллийн системд бүртгүүлдэг болно гэсэн үг. Энэ системийг УИХ-ын зүгээс 2023 оны нэгдүгээр улиралд багтааж ажил оруулна. Нүүрсний гэрээнүүд ил тод бус байдаг тал дээр дахин нэг заалтыг тусгаж өгсөн. Тухайлбал, Төрийн өмчийн нууцын зэрэглэлтэй гэрээнүүдийг цахим төлбөрийн системд бүртгүүлж, экспортод гаргадаг тогтолцоог бүрдүүлэх тогтоол шийдвэрийг УИХ гаргалаа. Мөн гэрээнүүдийг УИХ-д танилцуулах үүргийг Засгийн газарт өгсөн.

Мөн барилгын салбар, хувийн хэвшлийнхний эрх, ашгийг хамгаалах хэд хэдэн заалтууд орсон. Тухайлбал, улсын төсөвт шинээр оруулж буй ажлын дуусах хугацаа гурван жилд багтаах заалтыг Төсвийн тухай хуульд оруулсан. Аливаа төсөв тусгагдаж байгаа хөрөнгө оруулалт болон бүтээн байгуулалтад ирэх жилээс эхлээд дахин давтагдашгүй код өгнө. Хөрөнгө оруулалтын коджуулалтыг нэвтрүүлээд, хяналтын системтэй уялдуулна.

Төсвийн хүрээний мэдэгдлийг төсвийн тухай хуультай хамтад нь хэлэлцдэгийг болиулж байгаа юм” гэв.

Д.Батчулуун