Сурагч Жулиус Исингома баруун Уганда дахь сургуулийнхаа дотуур байранд лалын босогчдын үйлдсэн шөнийн дайралтаас хэрхэн гайхамшигтайгаар амьд үлдсэн тухайгаа ВВС агентлагт ярьжээ. Касесе дүүргийн Бвера нэгдсэн эмнэлэгт сурвалжилагч түүнтэй уулзахад тэрбээр "Халдлага үйлдэгчид намайг үхсэн гэж бодоосой гэсэндээ би нас барсан найзынхаа цусыг ам, чих, толгойдоо нялсан. Энэ арга намайг аварсан" гэв. Өнгөрсөн баасан гаргийн орой Мпондве жижиг хотын дунд сургуульд уг халдлага болж, 40 орчим хүн нас барсны 37 нь сурагчид байж. 

Угандагийн Ерөнхийлөгч Йовери Мусевени холбоотны Ардчилсан хүчнийг (ADF) дайрсан гэж буруутгаж байгаагаа мэдэгдээд байна. Тэрбээр дэлгэрэнгүй мэдээлэл өгөөгүй ч БНАСАУ-ын хилийн цаана нуугдаж байсан зэвсэгт этгээдүүдийг агнана гэж амлав. Харин ADF энэ талаар хараахан тайлбар хийгээгүй байна.

Энэ байгууллага 1990-ээд онд байгуулагдсан, мусульманчуудын цөөнхийг хавчиж байна гэж ерөнхийлөгч Мусевенигийн эсрэг зэвсэгт мөргөлдөөн дэгдээсэн. Удирдагч нь 2016 онд Исламын улс (IS) бүлэглэлд үнэнч байхаа тангарагласан гэх мэдээлэл байдаг. Гэвч 2019 оны дөрөвдүгээр сард Угандатай хилийн ойролцоох армийн байрлал руу дайрсан гэдгээ мэдэгдсэн IS бүлэглэл тус бүс нутагт үйл ажиллагаагаа явуулж байгаагаа анх хүлээн зөвшөөрсөн. 

Зэвсэгт этгээдүүд Бүгд Найрамдах Конго руу ухарч байхад зургаан оюутан хулгайлагдсан гэж таамаглаж байна. Хэдэн цагийн турш үргэлжилсэн халдлагаас амьд гарч чадсан зургаан хүний ​​дунд Жулиус байсан. Тэрбээр халдлага үйлдэгчдийг хэн болохыг мэдээлээгүй. Ямартай ч буутай этгээдүүд орон нутгийн цагаар 22:00 цагийн орчимд халдлага үйлдсэн гэдгийг гэрчилсэн. Тэд хөвгүүдийн дотуур байранд ирэхэд хүүхдүүд аюул ирснийг мэдээд хаалгаа түгжсэн байжээ. Энэ нь зугтах боломжгүй болсон гол шалтгааны нэг аж. 

Л.Сайнаа