Сирийн иргэний дайнд оролцож буй лалын бүлэглэлүүд дундад зууны үеийн түүх болон мартагдах шахсан харгис аргыг хэрэглэж хүмүүсийг цаазалж байна. Саяхан цовдлуулж цаазлуулсан хоёр хүний зураг олон нийтэд дэлгэгдсэний дараа яагаад ийм харгис шийтгэл оноох болов гэсэн асуулт гарч ирсэн юм. Цовдлуулсан хүний цээжин дээр “Энэ эр лалын шашинтнуудын эсрэг тэмцэж, тэсрэх бөмбөг дэлбэлсэн” хэмээн бичжээ. Сирийн иргэний дайнд 2012 оноос эхлэн оролцож буй Ирак, Левантын лалын шашинт улс хэмээх жихад бүлэглэл энэ харгислалыг үйлдэж байгаа хэмээн хүний эрхийг хамгаалагчид шүүмжилдэг. Аль-Кайдагийн гар хөл болсон энэ бүлэглэл шариатын хуулиа хэрэгжүүлж байгаа хэмээн харгис үйлдлээ тайлбарладаг байна.

    Шашин судлаач доктор Усама Хасан тэднийг яагаад ийм өршөөлгүй байдгийг өөрийнхөөрөө тайлбарлав. Коран судрын 15-р дэвтэрт “Аллах болон түүний дагалдагсдын эсрэг дайн өдүүлэгчдийг өөрийн гараар цовдолж алах юмуу газар дэлхийгээс хөөн зайлуулна. Тэднийг энэ дэлхийн гутамшиг болгох нь хамгийн том шийтгэл” гэж бичсэн байдаг ажээ. Гэхдээ коран сударт бурхан эцэстээ бүхнийг уучилж, нигүүлсэдэг болохыг сануулдаг хэмээн Усама Хасан хэлэв. Тэгэхээр Ирак, Левантын лалын шашинт улс бүлэглэл үнэ хэрэгтээ лалын шашны үзэл санаанаас гажууд үйлдэл хийж байгаа гэнэ. Өнөөдрийн соёлт ертөнцөд цовдлох ялыг зөвхөн Саудын Арабад оноодог.