"Болорсофт" ХХК Windows үйлдлийн системийн орчинд "Юникод" стандартын дагуу монгол бичгийн гар болон таван төрлийн фонтыг гаргаж, хэрэглэгчид ашиглахад бэлэн болсон талаар өнөөдөр танилцууллаа. Өөрөөр хэлбэл, цахим орчимд монгол бичгээр бичих боломжтой болсон аж.

Өмнө нь цахим орчинд монгол бичгээр бичихэд кодчиллын стандартууд, фонтын ялгаатай байдал зэрэг маш олон шалтгааны улмаас ихээхэн хүндрэлтэй байжээ. Уг асуудлыг "Болорсофт" шийдсэн байна. 

Энэ талаар МУИС-ийн дэд профессор Э.Мөнх-Учрал "Монгол бичгээр бичиж, харилцах иргэдийн тоо буурсаар байна. Монгол бичиг устаж, үгүй болбол монгол хэл, соёл оршин тогтнох асуудал яригдана. Тиймээс энэхүү монгол бичгийн гарыг олон улсад нэвтрүүлснээрээ тус бичгийн төрлийг хадгалах нэг томоохон алхам болно” гэдгийг онцолж байв.

Харин тус монгол бичгийн гар нь олон улсын "Юникод" стандартад орох эсэх нь хэрэглэгчдийн таталт, санал хүсэлт, сэтгэл ханамж зэргээс шалтгаалах юм байна.