Мах, арьс ширний бэлтгэлийн чанарыг сайжруулах, технологи дамжуулах нэртэй сургалт энэ пүрэв гаригт болох гэж байна. Энэ арга хэмжээнд “Мах маркет”, “Мах импекс”, “Дархан Мийт Фүүдс”, “Эдмийт”, “Баруун Монгол Интернэшнл”, “Мийт Фүүдс”, “Баяндэлгэрэх Хүнс” зэрэг мах боловсруулах үйлдвэрүүдийн технологич, ажилчид, удирдлагууд, ХХААХҮЯ, МЭЕГ, МХЕГ, “Европын Холбоо”, НҮБХХААБ, МАШҮХ, ММХ, ХҮСХХ, ИРИМ, Мерси Кор, Адра болон зарим Элчин сайдын яамдын төлөөлөл оролцох юм.

Тодруулбал, НҮБ-ын Аж үйлдвэр хөгжлийн байгууллага (НҮБАҮХБ)-аас Тогтвортой хөгжлийн зорилтуудыг хэрэгжүүлэх Монгол Улсын Засгийн газрын бодлого, зорилтуудыг дэмжиж, Европын Холбооны санхүүжилтээр Монгол Улсын Засгийн газар, НҮБ-ын Хүнс, хөдөө аж ахуйн байгууллагатай хамтран “Монгол Улсад Хөдөлмөр эрхлэлтийг дэмжих” төслийг өнгөрсөн оны гуравдугаар сараас эхлэн хэрэгжүүлж байна.

2020 он хүртэл хэрэгжих уг төсөл мал аж ахуйн салбарт, ялангуяа нэмүү өртөг шингэсэн арьс шир, ноос ноолуур, мах, сүү үйлдвэрлэлийг хөгжүүлж, хувийн хэвшлийн өрсөлдөх чадавх, экспортыг нэмэгдүүлж зохистой хөдөлмөр эрхлэлтийг дэмжихэд чиглэж байгаа юм. Ингэхдээ боловсруулах үйлдвэрүүдэд олон улсын туршлагыг дотоодын туршлагатай хослуулан нэвтрүүлж, технологи дамжуулах замаар стандартад нийцсэн бүтээгдэхүүн экспортлоход хувь нэмэр оруулах зорилготой юм.

Төслийн хүрээнд өнгөрсөн оны арванхоёрдугаар сараас Монголын арьс ширний үйлдвэрлэлийн холбоо (МАШҮХ), салбарын зөвлөх инженерүүдийн хамтын оролцоотойгоор “Арьс, шир үйлдвэрлэл, мах бэлтгэлийн чанарыг сайжруулах” дэд төслийг хэрэгжүүлж эхэлжээ. Энэ хүрээнд Хүнс, хөдөө аж ахуй, хөнгөн үйлдвэрийн яам, Мал эмнэлгийн ерөнхий газар, Мэргэжлийн хяналтын ерөнхий газар, Хараат бус судалгааны хүрээлэн (ИРИМ), Монголын махны холбоо (ММХ), хувийн хэвшлүүд хамтран ажиллаж байна.

Одоогоор Улаанбаатар, Дархан-Уул, Орхон аймгийн махны 5-7 үйлдвэр, арьс шир боловсруулах гурван үйлдвэрт арьс ширний гэмтэл, гологдлыг нарийвчлан тодорхойлох зорилгоор 2749 ширхэг түүхий эдэд судалгаа, туршилтын ажил хийгээд байгаа юм байна. Мөн цахим-ажлын байрны интерактив сургалтын модулиудыг боловсруулж, “Арьс ширний үйлдвэрлэлийн ээлтэй, тогтвортой аргууд” бэлэн сургалтын агуулгаар 70 гаруй ажилчдад ажлын байрны сургалт зохион байгуулжээ.