Иргэн Б.Отгонбат Сэлэнгэ аймаг дах цагдаагийн газрын алба хаагчид хууль бус харьцаж, эрүүл мэндэд нь хохирол учруулсан талаар мэдээлэл хийлээ.

Түүнийг үл таних эмэгтэйгээр дуудуулж нэр бүхий алба хаагч нар хилс хэрэг тулгаж, гавлаж, хөлөнд нь хүнд бэртэл автал зодож, эрүү шүүлт тулгасан талаар хэлсэн юм.

Иргэн Б.Отгонбат “Уг хэрэг 2018 оны дөрөвдүгээр сарын 25-ны өдөр болсон бөгөөд хүнд гэмтэл авахад хүргэсэн алба хаагч нар тухайн үед согтуу байсан. Энэ үед цагдаагийн алба хаагч Х.Э нь намайг хээр хаяна хэмээн айлган сүрдүүлж, есөн цаг гаруйн хугацаанд тарчлаан зовоосон. Миний бие шилбэ, мэдрэлийн гэмтэл авч, баруун тавхайн санжилт, баруун өвдөгний дотор болон гадна үрэгдэл, арын чагтан холбоосын суналт зэрэг гэмтэл авч улмаас хөдөлмөрийн чадвараа 35 хувь хүртэл алдсан. Гэмтлийн улмаас хөл мэдээгүй болсон.

Гэмтэлд хүргэсэн алба хаагчид анхан шатны шүүх хурлаар орсон боловч иргэний журмаар тогтоол гаргасан” гэлээ.

Тэрбээр гэмтлийн улмаас хоёр удаа хагалгаанд орсон бөгөөд БНСУ-д хагалгаанд орох шаардлагатай гэсэн дүгнэлт гарчээ. Гэвч биед нь хүнд гэмтэл учруулсан алба хаагчид хохирлыг нөхөн төлөөгүйгээс гадна ял завшиж хэргийг өнгөрөөх магадлал өндөр байгааг тэрбээр хэлсэн юм. Мөн хэрэг шалгах явцад тухайн алба хаагчдын эд хөрөнгийн битүүмжилсэн тогтоолыг шүүх хүчингүй болгох шийдвэр гаргажээ. Түүнд тухайн үед цагдаагийн албах хаагчид хэрхэн ёсзүйгүй аашилж, зодож байгаа бичлэгийн хуулбар байгаа аж.

Мөн гэр бүлийг нь айлган сүрдүүлж, утсаар дарамталж залгадаг тухай хэлсэн юм. Тиймээс хэргийг үнэн зөвөөр шийдвэрлүүлж өгөхийг ХЗДХ-ийн сайдаас хүслээ.

Б.Лхам