УИХ-ын чуулганы хуралдаан эхэллээ. Хуралдаанаар Төлбөрийн чадваргүйдлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслийн талаар хэлэлцэж байна. Энэ үеэр УИХ-ын гишүүн Б.Энхбаяр мэдээллээ.

Тэрбээр "Сүүлийн гурван удаагийн УИХ, дөрвөн Засгийн газар дамнаж тоосонд дарагдсан дампуурлын тухай хуулийг оруулж ирж байгаад баяртай байна. Энэ бол хүн бүрийн анзаардаггүй, маш чухал харилцаа байгаа юм. Эрсдэлгүй бизнес гэж байдаггүй. Ковидын, дайн тулааны нөхцөл байдлууд ямар ч бизнест маш том эрсдэлийг харуулж байна. Сүүлийн хоёр гурван жилийн хугацаанд маш олон ААН-үүд хаалгаа барьж байна. Бусад улс оронд хүнийг нь амиа хорлуулж болохгүй гэж үздэг. Өр хүүхдээ өртэй болгоод үхдэг зүйл байж болохгүй гэдэг зарчим бий.

Мөн дампуурлын хууль шаардлага хангахгүй болсноор улбаалаад сүүлийн 20,30 жил худлаа дампууруулж мөнгө угаадаг, залилан хийдэг тогтолцоо бий болсон байна.

Ард банк, Сэргээн босголтын банк, Капитал банк байна. Өөрөөр хэлбэл, танил талууддаа өөрсдөө зээл аваад, худлаа дампуураад, татвар төлөгчдөөр энэ хохирлыг төлүүлдэг мэргэшсэн “ухаантай” хулгай хийдэг технологи бий болсон байна.

Худлаа дампуурч, татвар төлөгчдийн мөнгөөр баяждаг тогтолцоог таслан хаахын тулд энэ хууль заавал шаардлагатай байсан. Энэ хууль маш удаан дарагдсан. Санаатай дарагдсан байх гэж боддог шүү” гэв.

Д.Батчулуун