Монгол Улс бол хүн амын суурьшил сийрэг, хагас нүүдэлчин амьдралын хэв маягтай улс орнуудын нэг билээ. Манай улсын газар нутгийн ихэнх хэсэгт хаягжилт хангалтгүй, зарим газар огт хаягжилт байдаггүйг уншигч та мэдэх биз ээ. Иймд энэ асуудлыг шийдэхийн тулд Цахим хөгжил, харилцаа холбооны яам, “Монгол шуудан” ХК, “What3words” ХК хамтран гурван үгт хаягийг нэвтрүүлээд буй. Эхний ээлжид Сүхбаатар дүүргийн 18 дугаар хороог гурван үгт хаягаар хаягжуулсан байна. Гурван үгт хаяг нь шуудан хүргэгч, эмнэлэг, цагдаа, онцгой байдлын алба хаагчид хүрэх газраа эргэлзээгүй олох буюу хаяг байршлыг нарийвчлалтай, шуурхай тогтооход чухал ач холбогдолтой юм. Ийнхүү уншигч та бүхэнд гурван үгт хаягаар хаягжсан Сүхбаатар дүүргийн 18 дугаар хорооноос бэлтгэсэн сурвалжилгыг хүргэж байна.
Гурван үгт хаяг болон уг хаягжилтыг Сүхбаатар дүүргийн 18 дугаар хороонд хэрэгжүүлж эхэлсэн талаар албаны хүмүүсээс тодрууллаа.
ЦХХХ-ны сайд Н.Учрал: Хаягаа тодорхой болгож чадаагүйн улмаас хүүхдүүдээ хамгаалж чадахгүй байна
Тэрбээр “Ертөнцийн зүгээр гэрийнхээ хаягийг заадаг улс дэлхийд үлдсэнгүй. Ялангуяа, их хотод. Бид хаягаа заахдаа, ертөнцийн зүгээр баруун, зүүн талд худаг байгаа гээд л зааж байна шүү дээ. Хаягжилтын хуулийг батлахаар БХБЯ манай яамтай хамтраад ажиллаж байна. Хаягаа тодорхой болгож чадаагүйгээс болж бид хүүхдээ хамгаалж чадахгүй байна. Хүүхдүүд эцэг эхдээ болоод яаралтай үед хаягаа зааж өгөх гэхээр тодорхой зааж чаддаггүй. Үүнээс болоод яаралтай тусламж үзүүлэхэд төвөгтэй. Иймээс бид цаашид гурван үгт хаягийг хэрэглэж хэвших хэрэгтэй. Тухайлбал, үер усны аюулын үед онцгой байдал руу хэлье гэхээр хаягаа хэлж чаддаггүй. Энэ бол зөвхөн хотын асуудал биш.
“what3words” буюу гурван үгт хаягийн гол онцлог бол 60 гаруй орны хэлээр орчуулагдсан. 2012 онд Лондонд анх туршиж үзсэн дэлхийн хаяг юм. Google-тэй албан ёсны интеграци хийгдчихсэн.
Бид нар энэ хаягийг монголдоо хэвшүүлэх зорилгоор өнөөдөр Сүхбаатар дүүргийн 18 дугаар хорооны 2059 айлын хашаан дээр гурван үгт хаягийг хадсан. Хүн болгон гэрээсээ гарч ирээд “what3words” апплейкшн руу нэвтэрч, таны хаяган дээр тохиолдлын ямар гурван үг гарч ирж байгааг хараад хаягаа төвөггүй заах боломж бүрдэж байна. “what3words”-оор манай гэрт ямар гурван үгтэй хаяг байгаа вэ гэдгээ харчих юм бол энэ гурван үгт хаяг "Emongolia-тай бүрэн холбогдсон. Мөн хүүхдүүд Ekids-ээрээ ороод ганцхан товчлуур дарахад энэ гурван үгт хаягаар цагдаагийн байгууллага төвөггүй олох боломж үүсэж буй. Бид өнгөрсөн хугацаанд цагдаагийн байгууллага, онцгой байдал гэх мэт шаардлагатай байгууллагуудтай энэ ажлуудыг интеграци хийж холбох ажлуудыг хийж гүйцэтгэсэн. Онцгой байдал хэдийгээр сайн ажиллаж байгаа ч хаягжилтгүйгээс болоод цаг алдаад байна.
Энэ гурван үгээ цээжилж чадахгүй байна гээд Оюун ухааны академийн үүсгэн байгуулагч Х.Хатанбаатарт хэллээ. Энэ гурван үгийг цээжлүүлж өгөөч гээд. Энэ гурван үг бол дахин давтагдашгүй" гэв.
“Монгол Шуудан” ХК-ийн гүйцэтгэх захирал Б.Анхбаатар: Эхний ээлжид Сүхбаатар дүүргийн 18 дугаар хорооны 2059 айлыг хаягжуулсан
Тэрбээр “Цахим хөгжил, харилцаа холбооны яам, “Монгол шуудан” ХК, What3words компаниуд хамтран Сүхбаатар дүүргийн 18 дугаар хороог сонгон гурван үгийн хаягаар бүрэн хаягжууллаа. Монгол Улсад хаягжуулалтын асуудал асар хүндрэлтэй байдаг. Ялангуяа шуудангийн үйлчилгээ үзүүлэх, цагдаа, түргэн тусламж, Онцгой байдлын үйлчилгээг ард иргэдэд хүргэхэд хүндрэл их байдаг. Иймд технологийн шийдэл ашигласан хэлбэрээр гурван үгт хаягийг ашиглуулж эхэлж байна. Тухайлбал, энэ айлын үүдэнд “саальчин, түүхт, хүчээр” гэх гурван үг хадаастай байна. Энэ гурван үгийг хэлэхэд л энэхүү айлыг хаана байгааг замчилж зааж өгнө гэсэн үг. Эхний ээлжид Сүхбаатар дүүргийн 18 дугаар хорооны 2059 айлыг хаягжуулсан” гэв.
“What3words” ХК-ийн Хамтын харилцаа хариуцсан менежер Ж.Ундрам: “What3words” систем оффлайн буюу дата шаардахгүй
Тэрбээр “Дэлхийн гадаргуун 3м х 3м талбай тутамд гурван үг оноосон байгаа. Тэр гурван үгийг хэлээд өөрийн байршлаа зааж өгөх боломжтой. “What3words” гээд үнэгүй ашиглаж болох аппликейшн бий. Манай систем оффлайн буюу дата шаардахгүйгээр ажиллана. Иймд онцгой байдал, түргэн тусламж дуудах нөхцөл үүсвэл тэрхүү гурван үгт хаягаа хэлээд л болох юм” гэв.
Сүхбаатар дүүргийн 18-р хорооны төлөөлөгч Ц.Цогт-Од: Хорооны иргэд сэтгэгдэл өндөр байна
Тэрбээр “Манай хорооны хаягийн байршил эмх замбараагүй. Мухар гудмууд ихтэй. Мөн хотын төвөөс алслагдсан хороо юм. 10228 хүн амтай. Мэддэггүй хүмүүс байтугай мэддэг бид нар айлуудаа олоход хүндрэлтэй байдаг. Харин энэхүү гурван үгт хаягжилтыг хийснээр баруун эргээрэй, буруу явчихлаа гэдэг асуудал байхгүй болж байна. Гурван үгт хаягаа хэлэхэд л онцгой байдал, түргэн тусламж зэрэг үйлчилгээ саадгүй олоод ирэх бүрэн боломжтой болсон. Ийнхүү ЦХХХ-ны сайд Н.Учрал сайдын дэмжлэгээр хаягийн асуудлаа шийдэж байгаад баяртай байна. Хорооны иргэд ч мөн сэтгэгдэл өндөр байгаа” гэв.
Сүхбаатар дүүргийн онцгой байдлын төлөөлөгч: Гурван үгт хаягаар дуудлага мэдээлэл ирэхэд түргэн шуурхай очих боломж үүсэж байна
Тэрбээр “Гурван үгт хаягаар дуудлага мэдээлэл ирэхэд түргэн шуурхай очих боломжууд үүсэж байна. Цаг уурын хүндрэлтэй нөхцөл байдалд эрэн хайх, аврах ажиллагааны дуудлагууд ирдэг. Ингэхдээ ертөнцийн зүгээр, тэр уулын бэлд гэх зэрэг тодорхойгүй байдлаар байршлаа заадаг. Харин одоо технологийн ачаар яг байгаа газар нь очих боломж бүрдэж байна. Ард иргэддээ төрийн үйлчилгээг түргэн шуурхай үзүүлэхэд дэмжлэг болж байна. Манай байгууллагын зүгээс сэтгэл хангалуун хүлээн авч байна” гэв.
Д.Батчулуун
