БНХАУ 1980 оноос эхлэн хойд хэсгийн нутагт орших иргэддээ түлшний нүүрсийг үнэгүй олгох хөтөлбөр эхлүүлсэн. Энэхүү бодлого нь үнэгүй нүүрс хэрэглэгчид буюу хойд нутгийн хүн ардын тоог цөөлөх зорилготой байж болох талаар эрдэмтэд дүгнэжээ.

Хятад, АНУ, Израйлийн хамтарсан багийн судалгаагаар үнэгүй нүүрс хэрэглэгчдийн наслалт 5.5 жилээр буурсан болохыг тогтоожээ. Судалгааны багийнхан 1981-2000 оны хугацаанд 90 гаруй хотын агаарын бохирдол ямар түвшинд хүрсэн болон оршин суугчдын үхлийн түүхийг судалсан байна. Гэтэл Хуай голын хойд хэсгээр оршин суух 500 гаруй сая иргэд үнэгүй нүүрсийг халаалтын зорилгоор ихээр ашигласнаар агаарын бохирдол нь өмнөд хэсгийн нутгийнхаас 55 хувиар өссөн болохыг тогтоожээ. Мөн тус бүс нутгийн иргэд зүрх, уушигны өвчнөөр өвчлөх, нас барах нь үнэгүй нүүрсний бодлого 33 жилийн өмнөөс хэрэгжиж эхэлснээс хойш асар ихээр нэмэгдсэн байна. Ялангуяа бодлого тогтворжиж эхэлсэн үе буюу 1991-2000 онд иргэдийн наслалт 5.5 жилээр тогтмол буурч эхэлжээ. 

Энэ оны эхээр Дэлхийн эрүүл мэндийн байгууллага Хятад улсыг агаарын бохирдлын асуудлаа яаралтай шийдвэрлэхийг сануулсан билээ.