Ой гарантай хэрнээ харь гарагийн хүн шиг харагддаг Роона охины түүх дэлхий нийтийн анхаарлыг татаад байна. Энэтхэгийн зүүн хойд хэсэгт байдаг зэлүүд тосгонд төрсөн Роона Бегум охин тархины усжилттай төржээ. Хүүхдүүд тархины усжилттай төрөх нь тийм ховор үзэгдэл биш ч Роона охины хувьд хэтэрхий хүнд туссан байна. Түүний тархи тэр чигээрээ усаар дүүрсэн тул эмч нар хэдхэн сарын настай гэж эцэг, эхэд нь хэлжээ. Өдөр ирэх тусам түүний толгой томорч даагдахын аргагүй болсон бөгөөд тойргийн хэмжээ нт 94 см болжээ. Мөн тархинд нь 10 литр орчим шингэн хуралдсан байна. "Түүний толгой томрох тусам тэр идэх хүсэлгүй болж, зүгээр л үхлээ хүлээн хэвтэх болсон. Тиймээс түүнийг асрах эсвэл өөр газар руу авч явна гэдэг хүндрэлтэй болсон" гэж аав Абдул Рехман ярьжээ.

   Мөн охины толгой томрох тусам арьс нь сунаж, юм харах боломжгүй болсон байна. Роонагийн аав 18 настай бөгөөд тоосгоны үйлдвэрт ажиллаж, өдөрт 3 доллараас бага цалин авдаг аж. Харин ээж  Фатима нь "Ийм том толгойтой болохоор хүмүүс түүнийг хараад айдаг. Бидний ганц үр шүү дээ" хэмээн өгүүлжээ.
   Зэлүүд, бөглүүд тосгонд амьдардаг энэ гэр бүлийнхэн ийнхүү хүнд өвчин туссан охиноо эмчлүүлж чадахгүй байсан ч өнгөрсөн дөрөвдүгээр сард аз тохиожээ. Хоёр норвеги оюутан тэдний тосгоноор дайрахдаа "хачин жигтэй" охины зургийг авсан байна. Тэд уг зургийг интернетед байрлуулж, хүмүүсээс хагалгаа хийх мөнгө хандивлахыг хүсчээ. 1600 доллараас эхэлсэн хандивын мөнгө наймдугаар сар гэхэд 60 мянган доллар болтлоо өссөн байна. Энэ мөнгөөр хагалгаа хийлгэхээр Роона охиныг Нью Дели дэх "Фортис" эмнэлэгт авчирсан аж. Түүнийг харсан эмч нар эхлээд шоконд орсон бөгөөд тархины усжилттай хүүхэд олныг эмчилж байсан ч ингэтлээ томорч, хүндэрснийг харж байгаагүй хэмээн уулга алджээ. Тиймээс Роонагийн хувьд мэс засалд орно гэдэг аз сорьсон бас амь дүйсэн хэрэг болохыг эмч нар гэрийнхэнд нь хэлсэн байна. Ямартаа ч бүр хүндрэхээс нь өмнө оюутнуудын явуулсан мөнгөөр охинд хагалгаа хийжээ. Таван хагалгааны дараа 94 см тойрогтой байсан толгой нь 58 см болжээ. Хэвийн хүүхдийн толгой 38-48 см байдаг аж. Роонагийн толгойд байсан 10 литр шингэн багассан тул одоо охин толгойгоо чөлөөтэй хөдөлгөж байгаа гэнэ. Хамгийн азтай нь охин харж чаддаг болсон бөгөөд байнга инээмсэглэж, орчин тойронтойгоо танилцаж эхэлсэн байна. 
   Тосгондоо ирснийхээ дараа Роона охин бусдын анхаарлын төвд оржээ. Түүний ээж Фатима "Роона өсч том болохоороо уншиж, бичдэг болно. Бид хоёр /аав, ээж нь/ бичиг үсэггүй хүмүүс. Охины минь амьдрал биднийхээс илүү гэрэл гэгээтэй байгаасай" гэжээ.

   Гэхдээ Роона охин одоо бүрэн эдгээгүй байгаа. Энгийн хүүхэд шиг, эрүүл саруул болохын тулд тэр хэд хэдэн хагалгаанд орох шаардлагатай байгаа юм. Өнөөдөр "CNN" сайтын нүүрэнд гарсан энэ нийтлэл олон хүний анхаарлыг татаад байгаа бөгөөд охинд туслах хандивын санг өсгөнө гэж уг нийтлэлийг бичигч найдаж байгаа аж.