АНУ-ын Конгресс химийн зэвсэг хэрэглэсэн гэх Сирид цэрэг оруулах асуудлыг хэлэлцэж байна. Одоогоор албан ёсны дүн гараагүй байгаа ч барууны хэвлэлүүд аль намын төлөөлөгчид ямар байр суурьтай байгаагаар урьдчилсан тоон мэдээллүүд гаргаад байна.

АНУ-ын Конгресс нь Төлөөлөгчдийн танхим /Доод танхим/, Сенатын танхим гэсэн хоёр танхимаас бүрддэг хууль тогтоох байгууллага юм. Конгресс нь нийтдээ саналын эрхтэй 535 гишүүнтэй бөгөөд үүний 435 нь Төлөөлөгчдийн танхим, 100 нь Сенатын танхимд суудаг билээ.

 “CNN” агентлагийн мэдээлснээр Төлөөлөгчдийн танхмийн 435 гишүүний 41 нь Сирид цэрэг оруулахыг дэмжиж байгаа бол, 238 нь эсэргүүцэж байгаагаа илэрхийлжээ. Эсэргүүцэж буй төлөөлөгчдийн ихэнх нь ардчилсан намын гишүүд байгаа аж. Харин энэ танхмийн 154 гишүүн ямар санал өгөхийг тодорхой болгож чадаагүй байна. Байр суурь нь тодорхойгүй байгаа 154 төлөөлөгчийн ихэнх нь бүгд найрамдахчууд тул эсэргүүцсэн санал Төлөөлөгчдийн танхимд гарч болзошгүй байна.

Харин Сенатын танхмийн 100 гишүүний 30 нь дэмжиж байгаа бол 34 нь эсэргүүцсэн байр суурьтай байна. Байр суурь нь тодорхойгүй байгаа 36 төлөөлөгч байгаагийн талаас илүү нь бүгд найрамдахчууд байна.

Ерөнхийлөгч Барак Обама санал хураахын өмнө телевизийн томоохон сувгуудад Сирийн асуудлаар ярилцлага өгсөн юм. Мөн Төрийн нарийн бичгийн дарга асан Хилари Клинтон анх удаа энэ сэдвээр санал бодлоо хуваалцахаа зарласан билээ. Эдгээр мэдэгдлүүд төлөөлөгчдийн шийдвэрт нөлөөлөх оролдлого юм хэмээн ажиглагчид үзэж байна.