Ливид суугаа Украины элчин сайд, консул хоёрыг нийслэл Триполигоос Тунисын хилтэй залгаа Рас-Агадир суурин руу явж байхад нь үл мэдэгдэх этгээдүүд дээрэмдлээ хэмээн Арабын хэвлэлүүд мэдээлжээ.

Өнөөдөр Ливийн нийслэл Украины элчин сайдын цувааг гэмт этгээдүүд Эль-Майа районы орчимд дайрч зогсоон автомашин, гар утас, ЭСЯ, консулын тамга зэргийг нь  дээрэмдсэн байна гэж  Триполийг хянаж байгаа “Ливийн үүрийн гэгээ” зэвсэгт бүлэглэлийн төлөөлөгч мэдэгдсэн байна. Дээрэмчид хэсэг хугацааны дараа дипломатуудыг чөлөөлсөн ч тэд хаашаа явсныг “Ливийн үүрийн гэгээ”-ний төлөөлөгч дурдаагүй байна.

“Ливийн үүрийн гэгээ” бүлэглэл болохоор украины дипломатуудад халдсан хэргийг “Ливийн омгийн зэвсэгт бүлэглэл” байгууллага үйлдсэн гэж буруутгаж байна. Энэ нь генерал Халиф Хафтарын удирдлага дор Ливийн үндэсний армитай хамтран ажилладаг бүлэглэл юм байна.

Харин Ливийн армийнхан үүнийг няцааж “энэ бол засгийн газрын хүчнийг буруутгах гэсэн оролдлого” гэжээ.