У.Хүрэлсүхийн тэргүүлсэн Засгийн газар өнгөрсөн арваннэгдүгээр сард коронавирусний цар тахлын үед айл өрх, аж ахуйн нэгж, байгууллагад дэмжлэг үзүүлэх зорилгоор цахилгаан, дулаан, цэвэр, бохир усны төлбөрийг төрөөс хариуцахаар шийдвэрлэсэн юм.

Өнгөрсөн оны арванхоёрдугаар сарын 1-нээс ирэх долоодугаар сар хүртэл хэрэгжих шийдвэрийн хэрэгжилт ямар байгаа талаар Эрчим хүчний зохицуулах хорооны дарга А.Тлейхан мэдээлэл өглөө. Тэрбээр “Засгийн газар өнөөдрийн байдлаар нийтдээ 980 мянган хэрэглэгчийн цахилгаан, дулааны 290 тэрбум төгрөгийг хариуцан төлөөд байна. Цаашлаад айл өрх, зарим аж ахуйн нэгж, байгууллагын цахилгаан, дулааны эрчим хүч, дулааны уурын төлбөрийн хөнгөлөлтөд цахилгаан эрчим хүчний 683 мянга, дулааны эрчим хүчний 297 мянга, давхардсан тоогоор нийтдээ 980 мянган хэрэглэгч хамрагдсан байна. Тогтоолыг хэрэгжүүлсэн хугацаанаас буюу 2020 оны арванхоёрдугаар сар, 2021 оны нэг, хоёр, гуравдугаар сард цаxилгаан, дулааны эрчим xүч, дулааны уурын төлбөрөө Монгол Улсын Засгийн газраас хариуцуулж байгаа хэрэглэгчдийн нийт төлбөр 345 тэрбум төгрөг бөгөөд үүнээс 290 тэрбум буюу 84 хувийг Монгол Улсын Засгийн газраас төлсөн байна” гэлээ.

Цаашдаа дөрөв, тав, зургаадугаар сард 194 тэрбум төгрөгийн цахилгаан, дулааны эрчим хүч, дулааны уурын төлбөрийг Монгол Улсын Засгийн газраас хариуцаж, хэрэглэгчдийн өмнөөс төлнө гэлээ. Ингэснээр Монгол Улсын Засгийн газар цар тахлын үед айл өрх, аж ахуйн нэгж, байгууллагад дэмжлэг үзүүлснээр хэрэглэгчдийн өмнөөс нийтдээ 484 тэрбум төгрөгийг төлөх тооцоо гарчээ.

У.Тэргэл