Үндэсний их баяр наадам тэмдэглэхийг эсэргүүцсэн иргэд, салбар, салбарын төлөөлөл Төв талбайд яг одоо цуглаж, дэлгэсэн туузан дээр иргэд гарын үсэг зурж, байр сууриа илэрхийлсээр байна. Энэхүү арга хэмжээнд олон хүн ирж гарын үсгээ зурж, үзэл бодлоо илэрхийлсээр байна. Тэдний нэг болох дуучин Т.Мөнх-Оргил “Нэгдүгээрт, төр, засаг “Ковид”-оор өвчилсөн, амь насаа алдсан иргэдээсээ уучлалт гуй. Хоёрдугаарт, цахимаар тэмдэглэх Үндэсний их баяр наадмаа цуцал. Би энд ирээд өдөржингөө хүмүүстэй уулзлаа. Тэгэхэд нэг ч хүн наадам тэмдэглэе гэж хэлэхгүй. Харин ч эсэргүүцэж буйгаа хэлж байна. Наадам тэмдэглэх төсөв мөнгөө эмч, эмнэлгийн салбарынханд, хүнд өвчтэй хүмүүст зарцуулмаар байна. 

Төв талбайд эсэргүүцлээ илэрхийлж байгаа хүмүүсийн дийлэнх нь худалдаа үйлчилгээний салбарынхан аж. Мөн голдуу залуус ирж “Баяр наадмаа боль”, “Хүний амиар тоглохоо зогсоо, “No наадам” гэх лоозон барьсан байлаа.  

 “Тэвчээр тасарлаа” хөдөлгөөнийг санаачлагчид Төв талбайд ирсэн байх ба тэд “Бид зүгээр л ажлаа хиймээр байна. Өөр хүсэх зүйл алга.  Наймдугаар сарын 31-нийг хүртэл ер тэсэхгүй нь” гэцгээж байна.

Тордайн Ганболд:Ард түмэн арав гаруйгаараа үхэж байхад хаад ноёдод зориулсан наадам хийхийг эсэргүүцэж байна

Бизнес эрхлэгч Тордайн Ганболдын сэтгэгдлийг сонслоо. Тэрбээр “Мунхаг засаг төртэй юм, бид. Өнөөдөр ард түмэн хоногт арав гаруйгаараа үхэж байхад зөвхөн хаад ноёдод зориулсан наадам хийх гэж байна. Ямар ч эрүүл хүний ухаанд гэртээ тэвчээд суух боломж байхгүй. Ийм мунхаг төртэй. Та нарын зарц болъё гээд ирсэн улс энэ Төрийн ордонд сууж байгаа. Төсвийн мөнгөөр хэсэг бүлэг хүн гараа угаагаад сууж байдаг. Үүний төлөө бид тэмцдэг, идэвхтэй оролцдог байх ёстой. Иргэний нийгэм нь маш хүчтэй байж эрх баригчдаа байранд нь тавьж, зөв явуулдаг. Бид хүлцэнгүй байгаад байвал цаашдаа нөгөө Таджикстан, Хойд Солонгосын загвар руу л орно. Ийм зам руу л бид явж байна. Ардчилал ч үгүй, ард түмэн ч үгүй, улс үгүй болно. Бүх залуус  ирж үзэл бодлоо илэрхийлээрэй. Энэ бол Үндсэн хуулиар олгосон эрх. Иргэд гэртээ хоригдсон, ресторанаа хаасан, харин эрх баригчид сонгуулиа хийсэн, халдварыг тараасан.  Ийм байж таарахгүй. Энэ улсын эзэд нь иргэд, бид байхгүй юү. Тиймээс бид, бидний үзэл санаа дийлэх ёстой” гэлээ.

Ийнхүү залуус “Тэвчээр тасарлаа” хэмээн уухайлан иргэдийн гарын үсэгтэй туузыг барин Төрийн ордныг тойрон жагсаж байна.

У.Тэргэл