Зам тээврийн хөгжлийн яамны балаг дуусахгүй үргэлжилсээр. Тус яамыг толгойлж буй Л.Халтар сайд хаахна, юугаа бодож явдаг юм бол доо. Салбар нь нуран унаж, олон мянган тээвэрчид өчнөөн сараар зам дээр хонож, иргэдийн ачаа бараа хагас жилээр гацаж,шатахуун тээвэрлэж явсан ачааны галт тэрэгнүүд нь онхолдсоноос гурван га талбайн хөрс 50 см гүн бохирдож, Дарханы зам нь там болчихоод байхад эрхэм сайдтан хээвнэг суухын учир юу вэ.

Өдгөө бол тэрбээр ёс суртахууны хариуцлагаа хүлээж, огцорсон байх ёстой бус уу. Танхимын тэргүүн ч нэг сайд нь салбараа удирдан авч явах чадвар, чадамж, сэтгэл үгүй байхад өөгшүүлээгүй л юм бол хэдийнэ хариуцлагын асуудлыг ярих байсан. Гэвч одоо ч хожимдоогүй байна.

Замын-Үүдэд аль өнгөрсөн гурав, дөрөвдүгээр сард ирсэн ачаагаа иргэд, аж ахуйн нэгж авч чадахгүй цөхөрч, эсвэл олон саяын хахууль өгч байж очер дугаар авдаг, Тяньжин дээр автомашинууд гацаж, машин бүрээс нэмж 3-10 саяыг нэхэж жолооч нарыг маань шар махтай нь хатааж байхад чадамжгүй сайд нь асуудлыг шийдчихэж чадахгүй, арга ухаанаа олохгүй сууна.

Гэтэл “Ланд Круйзер-300” автомашин үйлдвэрлэгчид нээлтээ хийгээд ердөө тав хоногийн дараа Монголын зах зээлд хэдийнэ ороод ирчихсэн, захиалгаа аваад эхэлчихсэн байхад урагшгүй сайд Л.Халтарын хариуцсан салбар уруудан доройтсоор, үүний улмаас ачаа бараа нь хагас жилээр гацаж аргаа барсан олон мянган хүн бухимдахаас өөрийг хийж чадахгүй сууна.

Ерөнхий сайд аа, салбартаа жижигдсэн энэ сайддаа хариуцлага тооцон огцруулж, харин чаддаг, сэтгэдэг нэгэнд ажлыг нь өгөхгүй бол энэ салбар эргэн сэхэхээсээ өнгөрлөө. 

У.Тэргэл