Коронавирусний халдвар хэдийнэ цар тахлын хэмжээнд хүрч, 700 орчим хүн нас бараад байна. Харин коронавирусний эсрэг вакцинжуулалтыг эрчимтэй хийгээгүй байсан бол энэ тоо хэд дахин өсөх  байсан гэдгийг мэргэжлийнхэн хэлж, дархлаажуулалтдаа идэвхтэй хамрагдахыг уриалсаар байгаа билээ. 

Коронавирусний вакцинд хамрагдсан дөрвөн хүн тутмын гурвыг нь бүрэн хамгаалж, дөрөвний нэг нь хөнгөн тусч байна гэх тоон судалгаа гарчээ. Мөн вакцинд хамрагдсан ч коронавирусний халдвараар өвчилсөн хүмүүсийн 80 хувь нь шинж тэмдэггүй, хөнгөн тусаад эдгэрч байгаа аж.

Энэ бол вакцинжуулалтын түүнийг гардан хийж, зохион байгуулж буй эмч, эрүүл мэндийн салбарынхны ач тус. Ард иргэдээ вакцинжуулж, энэ ажлыг эрчимжүүлэхэд эрүүл мэндийн салбарынхан хоёргүй сэтгэлээр зүтгэж буй. 

Монгол Улс коронавирусний дархлаажуулалтаараа дэлхийд тэргүүлж буй таван улсын нэг болоод байгаа. Тиймээс ч өнөөдөр хатуу хөл хориогүй, зуны дэлгэр цагийн сайхныг мэдэрч, аялаж, зугаалж байна. Эдийн засаг ч аажмаар сэргэж байгаа. Энэ бүхэн нь  вакцинжуулалтын үр дүн гэдэгтээ маргах хүн үгүй биз. 

Манай улс "СОVAX" хөтөлбөрийн хүрээнд ирсэн вакцинаар ард иргэдийнхээ 60 хувийг хамруулаагүй бол нас баралт есдүгээр сарын 1  гэхэд 6000, арваннэгдүгээр сар гэхэд 8000-д хүрэх байсан юм. Түүнчлэн нас баралт өдөрт 20-40 бүртгэгдэх байсан гэдгийг ч судлаачид тооцоолж, хэлсэн байдаг.

Харин өнөөдөр зарим хүн дархлаажуулалтын үр дүнг төдийлөн ойлгохгүй, вакцинжуулалтаа бүрэн хамрагдахгүй байгаа нь харамсалтай. Эмч, эрүүл мэндийн салбарынхныхаа хичээл зүтгэл, хөдөлмөрийг үнэлж, тэдэнд төдийгүй өөрсдийнхөө эрүүл мэнд, амь насыг авран хамгаалахын тулд дархлаажуулалтдаа идэвхтэй хамрагдах нь иргэн бүрийн үүрэг болоод байна. 

Эс бөгөөд халдварын тоо тасралтгүй өсч, эрүүл мэндийн салбарынхан ачааллаа дийлэхгүй, орны хүрэлцээ багасаж, энэ хэрээрээ эрсдэл нэмэгдэх юм. Тиймээс бид дэлхий нийтийг хамраад буй аюулт цар тахлыг хамтдаа даван гарахын тулд өдөр шөнөгүй та, бидний төлөө зүтгэж байгаа цагаан нөмрөгт баатрууддаа талархлын үгийг дайж, тэднийхээ, өөрсдийнхөө төлөө хичээж, сайхан цагийг угтах болно. 

Б.Баатар