Дэлхий нийтийг хамарсан цар тахал бүхий л улс орныг туйлдуулж, аюулт энэ өвчнийг даван гарах гэж байдгаараа л хичээж байна. Манай улсын хувьд ч адил. Сайны хажуугаар саар гэдэг. Гэвч эсрэгээрээ зүйл бас байна. Тухайлбал, Ковидын эерэг сайн тал нь Монгол Улс уналтад ороод байсан эрүүл мэндийн салбараа босгох гэж хичээж байна. Ямархан хэм хэмжээнд явж байсныг нь хаа хаанаа хүлээн зөвшөөрч, техник тоног төхөөрөмж хэрэгцээт бүхнээр хангаж, эмч, эмнэлгийн ажилтнуудын хөлс хөдөлмөр, хичээл зүтгэл асар үнэ цэнэтэйг олж, ухаарлаа.

Төр, засаг ч цар тахлын эсрэг хүчээрээ тэмцэж байгаа эрүүл мэндийн салбарынхандаа анх удаа талархан урамшуулж, цалин хөлсийг нэмэгдүүлэх гарц гаргалгааг хайж эхэллээ. Ямартай ч, Ковидын “буян”-аар эмч, эмнэлгийн ажилтнууд маань цалингаа нэмэгдүүлж, амьжиргаагаа дээшлүүлэх боломжийг олголоо.

Цаашлаад мафи болтлоо хүчирхэгжээд байсан Замын-Үүдийн хил, гаалийнхны луйврыг илчиллээ. Мафийн бүлэглэлийнхэнд хэдэн саяар нь авлигыг атгуулдаг эрхмүүдийн ачаа бараа ногоон гэрлээр орж, гардаг бол жирийн иргэд хэн нэгнийг царайчилсаар хагас жилийн нүүр үзэж байх жишээтэй. Тиймээс төр, засгаас дорвитой арга хэмжээ авч, Замын-Үүдэд цагдаа, тагнуулынхны десант буулгаж, хил, гаалийнхныг бүхлээр нь өөрчилж байх вэ.

  Сүүлийн арав гаруй жилийн турш л Замын-Үүдийн нөхцөл байдлын талаар ярьж, шүүмжилж ирсэн ч тоосон албан тушаалтан үгүй байсан юм. Тиймээс олон жилийн турш бугшсан авлига, албан тушаалын хэргийг цэгцэлж, мафийг бутаргасан нь мөн л Ковидын буян юм.

Тодотговол, эрүүл мэндийн салбар хуучнаараа явсан бол 10-20 жилийн дараа л өндийж, сэхэх байлаа. Мөн хил, гаалийн булхай луйвар улам нарийсч, мафи нь тэлэн томрох байлаа. Наад захын жишээ энэ юм. Хамгийн гол нь Монголын ард түмэн төр, засгийнхаа шийдвэрийг ухамсартайгаар даган мөрдөж, нэг зүгт харж чаддагаа харуулсан нь, мэдэрсэн нь Ковидын хамгийн том ололт байлаа.

У.Тэргэл