Гадаад зах зээлд нефтийн бүтээгдэхүүний үнэ өсөж байгаатай холбоотойгоор Монгол Улсын шатахуун импортлогч компаниуд жижиглэнгийн шатахууны үнийг литр тутамд  нь 300 хүртэл төгрөгөөр нэмсэн. Тэгвэл шатахууны үнийн өсөлттэй холбоотойгоор Шударга өрсөлдөөн компаниудад шалгалт явуулж дууссан байна. Шалгалтын дүнд эхний ээлжид шатахуун импортлогч, үйлдвэрлэгч 26 компанид торгуулийн арга хэмжээ авахаар болсноо зарласан юм.

Мөн шатахууны чанарын доголдол, стандарт шаардлагыг удаа зөрчсөн зарим аж ахуйн нэгжийн тусгай зөвшөөрлийг цуцлуулах саналыг Шударга өрсөлдөөн, хэрэглэгчийн төлөө газраас Уул уурхай хүнд үйлдвэрийн яам болон Ашигт малтмал, газрын тосны газарт хүргүүлсэн байна. Цаашлаад шатахууны чанар, стандартад хийсэн шалгалтын дүнг долоодугаар сарын 20-нд нийтэд мэдээлэх юм байна.

Монгол Улсад нийт 102 аж ахуйн нэгж шатахуун импортлох зөвшөөрөлтэй. ШӨХТГ-ын үе үеийн дарга нар шатахуун импортлогчидтой “тулж” ирсэн. Экс дарга О.Магнай энэ салбартаа монопол 17 компанийг шүүхэд өгч, дуулиан тарьж байв.

Энэ удаад ч ШӨХТГ-ын дарга Б.Бат-Эрдэнэ 26 компанийг торгож, заримынх нь үйл ажиллагааг зогсоохоо мэдэгдлээ. Энэ хэрээр тус газрынханд дарамт, шахалт ихээр ирж, элдвээр “оролдож” эхэлжээ. Үеийн үед ийм байсан, өдгөө ч тасраагүй бололтой.

У.Тэргэл