Авлигатай тэмцэх газрын Олон нийтийн зөвлөлийн гишүүд "Лиценз дагасан авлига" сэдвээр мэдээлэл хийж байна. Энэ үеэр Олон нийтийн зөвлөлийн гишүүн, сэтгүүлч Б.Отгон мэдээлэл өглөө. Тэрбээр "Өнөөдөр Монгол улс энэ олон уул уурхай ашиглаад, олборлолт үр ашиг нь хаашаа орж байгаа юм бэ. Олон уурхай ашиглаж байгаа боловч Монгол улс яагаад өрөнд орчхов. Өнөөдрийн байдлаар Монгол улсад 2582 ширхэг хайгуулын болон ашиглалтын лиценз байна. Өнгөрсөн 30 жил энэ олон орд газруудыг ашиглаж ирсэн мөртлөө одоо нэг хүнд 30 сая төгрөгийн гадаад өртэй байна. Энэ уул уурхайн үр ашиг хэнд зориулагдаад байгаа юм бэ. Уул уурхайгаас олж байгаа орлогын 90 хувь нь лиценз эзэмшигч нэртэй гадна дотины компаниудад орж байна. Харин арав хүрэхгүй хувь нь улсын төсөвт орж байна. Байдал нөхцөл ийм байхад үүнд дүн шинжилгээ хийх хэрэгтэй. Ард түмэндээ хүртээлтэй, Монгол улсдаа ашигтай, хөгжилдөө зориулсан байхыг дүгнэхгүйгээр дахин лицензийн тухай ярьж байна. Уул уурхайгаас хүртэж буй ашгаасаа илүү байгаль орчин, бусад байдлаар хохирол их байгаа юм. Хэдхэн хоногийн өмнө говийн малчид төв талбайд ирж жагссан. Тэдгээр малчдад танай нутагт хоёр жил газар ухахгүй гэж хэлээд малчдын тэмцлийг тараасан. Гэвч энэ хөтөлбөр бодлого хэвээрээ байгаа. Үүний ард авлигал хээл хахууль явагдаж байгаа гэж харж байна. Авлигал, үр ашиггүй байгаа уул уурхайн олборлолтоо цэгцэлсний дараа лиценз нэмж олгох тухай ярь” гэв.

Д.Батчулуун