Мэргэжлийн холимог тулааны хамгийн оргил нь UFC. Үзэгч болон хандалтаараа MBA-гаас дутахгүй гэдэг. UFC-ийн тулаануудыг дэлхийн 165 гаруй улс орон, 60 гаруй дэлхийн өргөн нэвтрүүлгийн түншүүдээр дамжуулан нийт 1.1 тэрбум гаруй өрхөд 40 гаруй хэлээр дамжуулан цацдаг юм. Энэ рингэнд гарсан анхны монгол тамирчин, анхны ялалт авсан монгол тулаанч бол Данаагийн Батгэрэл. Тэр энэ сарын 24-нд ээлжит тулаанаа хийх бөгөөд хоёр тулаанчны талаарх мэдээллийг хүргэж байна.
“Талын шуурга” хочит Д.Батгэрэл нь холимог тулааны карьераа 12 жилийн өмнөөс эхлүүлэхдээ Хятадын “Legend Fighting Championship”, Монголын “MGL-1 Fighting Championship” Ranik ‘Ultimate Fighting Federation’ зэрэг холбоонд тулалдаж байв. Амжилтаас нь дурдвал “MGL-1 Fighting Championship”-д таван тулаанаа ялалтаар дуусгаж, кикбоксын 65 кг-ын жинд аварга цол хүртсэн юм. 2015 онд UFC-д тулалдахаар АНУ-ыг зорьж, 2019 оны намар анхны тулаанаа Өвөрмонголын тулаанч Хэйли Алатенгтай хийхдээ ялагдсан ч тухайн тулаан тэр үдшийн шилдгээр шалгарч байлаа. Гал гарсан тулаан гэвэл үүнийг л хэлэх биз. Дараа нь жил Гиод Каннетиг 3:01 минутад хүнд цохилтоор буулган авсан нь манай тамирчны UFC дэх анхны ялалт байв. 2021 онд Кевин Нативададыг 50 секундэд хүнд цохилтоор ялж, тухайн оны аравдугаар сарын 17-нд Брэндон Девисийг 2:01 минутад ялсан байна. Харин 2022-2023 оны хооронд хоёр тулаан хийхдээ ялалт аваагүй бөгөөд энэ хар цувралыг зогсоох эсэхээ энэ сарын 24-нд шийдэх юм. Д.Батгэрэл дэлхийн чансааны 49-д эрэмбэлэгдэж байна.
Д.Батгэрэлийн өрсөлдөгч Брэди Хистанд гэгч хэн бэ?
Брэди Хистанд бол тулааны мэдээлэл багатай, нууцлаг тулаанч юм. Америк эр Брэди Хистанд нь 1999 оны дөрөвдүгээр сарын 30-нд АНУ-ын Вашингтонд төрсөн ба өдгөө 24 настай, 1.73 см өндөр, 61 кг жинтэй, “Bambam” хочтой юм байна. Тулааны спортын хажуугаар гал унтраах албанд хүчин зүтгэдэг бөгөөд найман настайгаасаа бокс, кикбоксын спорт сонирхож, 14 настайдаа жиүжицүгээр хичээллэх болж. Нэрд гараагүй боловч амаргүй өрсөлдөгч байх нь. UFC-гээс зохион байгуулдаг “TUF-29” шоунд шигшээ шатанд шалгарснаар UFC-д оролцох эрхээ авч одоогоор нэг ялж, нэг ялагдсан үзүүлэлттэй аж. Тэр 18-тайдаа Аллен Мэсик гэх тамирчинд ялагдсанаа огт мартаж чаддаггүй хэмээн хэлсэн удаатай. Гэвч энэ ялагдал түүнд илүү хичээн суралцахад дэм болсон гэж ярьжээ. Д.Батгэрэл, Брэди Хистад нарын тулаан болоход 20 хоног үлдлээ. UFC-ийн тулаануудыг дэлхийн 165 гаруй улс орон, 60 гаруй дэлхийн өргөн нэвтрүүлгийн түншүүдээр дамжуулан нийт 1.1 тэрбум гаруй өрхөд 40 гаруй хэлээр дамжуулан цацдаг юм.
Б.Батжаргал
