Энэ удаагийн хурлаар хэрэгжиж буй хөтөлбөрүүдийн зээлийн зэргэн төлөлт, Хөдөлмөр эрхлэлтийг дэмжих сангийн 2024 оны гүйцэтгэлтэй танилцаж, 2025 онд хэрэгжүүлэх арга хэмжээний хуваарийг баталлаа.

Өнгөрсөн онд аймгийн хэмжээнд 618 ажлын байрны захиалга авч, 246 иргэнийг ажилд зуучилж, хөдөлмөр эрхлэх чадавхийн үнэлгээ, хувийн төлөвлөгөө хийх үйлчилгээнд 300 иргэнийг хамруулжээ. Малжуулах хөтөлбөрт малгүй болон богт шилжүүлсэнээр 200 хүртэлх толгой малтай 244 өрх, 488 иргэн хамрагдсан ба нэг өрхөд 8 сая төгрөгийн зээлийг эргэн төлөгдөх нөхцөлтэйгээр олгожээ. Хөгжлийн бэрхшээлтэй иргэдийн хөдөлмөр эрхлэлтийг дэмжих арга хэмжээнд 199 сая төгрөг зарцуулсан ба 25 байнгын ажлын байр бий болгож, нэг иргэнд 8 сая төгрөг олгоод байна.

Мөн аж ахуй эрхлэлтийн сургалт, түр ажлын байрыг дэмжих арга хэмжээ, ахмадын хөдөлмөр эрхлэлтийг дэмжих хөтөлбөр, Засгийн газар болон хөдөлмөр эрхлэлтийг дэмжих үндэсний зөвлөлөөс тодорхойлсон хөтөлбөр зэрэгт нийт 3233 иргэнд үйлчилгээ үзүүлж, 1406 иргэнийг байнгын болон түр ажлын байрт зуучилжээ.

Аймгийн Засаг дарга, Хөдөлмөр эрхлэлтийг дэмжих зөвлөлийн дарга Г.Өнөрбаяр цаашид хэрэгжүүлэх ажлуудын саналуудтай танилцаж, зөвлөлийн үйл ажиллагааг идэвхижүүлэх, олон нийтэд ажлаа ил тод тайлагнах, хөтөлбөр, зээлүүдийн мэдээллийг иргэдэд сайтар түгээх талаар чиглэл өгөв.