Нийслэлийн иргэдийн Төлөөлөгчдийн Хурал дахь Монгол Ардын Намын бүлэг ээлжит хуралдаанаа хийж, НИТХ-ын ээлжит бус XIV хуралдаанаар хэлэлцэх асуудлуудын талаар санал солилцон, бүлгийн байр сууриа нэгтгэлээ.
Хуралдааны эхэнд “Нийслэлийн хөгжлийн 2027 оны төлөвлөгөө батлах тухай” асуудлыг хэлэлцэж, төлөвлөгөөнд тусгагдсан арга хэмжээний хэрэгцээ, ач холбогдол, хэрэгжилт, төсөв санхүүжилт болон хүлээгдэж буй үр дүнгийн талаар санал солилцлоо. Энэ хүрээнд нийслэлийн хүнсний хангамж, тэр дундаа хүнсний ногооны дотоодын үйлдвэрлэлийг нэмэгдүүлэх чиглэлээр 2027 онд хэрэгжүүлэхээр төлөвлөж буй ажил, төр, хувийн хэвшлийн түншлэлийн хүрээнд хэрэгжүүлэх төсөл, арга хэмжээний талаар НИТХ-ын төлөөлөгч Г.Батбаяр тодрууллаа. Үүнд, Хан-Уул дүүргийн 13 дугаар хороонд Бүгд Найрамдах Солонгос Улсын Олон улсын хамтын ажиллагааны байгууллага /КОЙКА/-тай хамтран дөрвөн улирлын хүлэмж байгуулах ажлыг 2019 оноос үе шаттайгаар хэрэгжүүлж байгаа гэх тайлбарыг холбогдох албаныхан өгөв.
Төлөөлөгчид нийслэлийн иргэдийг эрүүл, аюулгүй хүнсээр тогтвортой хангах асуудалд бодлогын түвшинд анхаарч, хүнсний үйлдвэрлэл, хангамжийн чиглэлээр хэрэгжүүлж буй төсөл, арга хэмжээг харилцан уялдуулах шаардлагатайг онцоллоо. Энэ хүрээнд нийслэлийн хүнсний ногооны хэрэгцээг дотоодын үйлдвэрлэлээр хангах, импортыг орлох бүтээгдэхүүний үйлдвэрлэлийг нэмэгдүүлэх зорилго бүхий “Агро-Сити” эдийн засгийн тусгай бүсийн үйл ажиллагааг бусад холбогдох төсөл, хөтөлбөртэй уялдуулан, нэгдсэн бодлогоор хэрэгжүүлэх хэрэгтэйг сануулав.
Хүнсний хангамжийг нэмэгдүүлэх бодлого нь нийслэлийн иргэдийн хүнсний аюулгүй байдлыг хангахаас гадна ерөнхий боловсролын сургууль, сургуулийн өмнөх боловсролын байгууллагад сурч, хүмүүжиж буй хүүхдүүдийг эрүүл, аюулгүй хүнсээр хангах нөхцөлийг бүрдүүлэхэд чухал ач холбогдолтойг тэмдэглэлээ.
Мөн нийслэлийн бүтээн байгуулалт, хотын хөгжлийн хүрээнд хэрэгжүүлж буй зарим ажлын талаар тодруулга хийв. Тухайлбал, НИТХ-ын төлөөлөгч Л.Ариунтуяа “Сэлбэ хот”-ын бүтээн байгуулалтын ажлын хүрээнд төлөвлөлтөд орсон хэсэгт үлдсэн айлуудын газрыг чөлөөлөх ажил 2027 оны хөгжлийн төлөвлөгөөнд тусгагдсан эсэх, Чингэлтэй дүүргийн эмнэлгийн барилгын тоног төхөөрөмжийн хангалт, суурилуулалтын ажил ямар шатанд байгаа талаар тодруулсан юм.
Түүнчлэн ерөнхий боловсролын сургуулийн орчин дахь үе тэнгийн дээрэлхэлтээс урьдчилан сэргийлэх, хүүхдийн аюулгүй байдлыг хангах асуудалд анхаарч, энэ чиглэлээр нийслэлийн хэмжээнд хэрэгжүүлж буй бодит ажил, арга хэмжээний талаар тодорхой мэдээлэл авах шаардлагатайг төлөөлөгчид хэлэв.
Харин төлөөлөгч Ж.Энхжаргалан нийслэлийн хөгжлийн 2027 оны төлөвлөгөөнд тусгагдсан зарим арга хэмжээний зорилго, хэрэгжүүлэх арга зам, хүрэх үр дүн тодорхой бус байгаад анхаарч, төлөвлөсөн ажлыг хэрэгцээ, ач холбогдол, үр өгөөжид үндэслэн дахин нягталж, эрэмбэлэх хэрэгтэй гэв. Мөн хойшлуулах, үе шаттай хэрэгжүүлэх, төсөв санхүүжилтийг бууруулах боломжтой ажлуудыг дахин нягталж, төлөвлөгөөг илүү бодитой, хэрэгжихүйц байдлаар боловсруулах шаардлагатайг хэлэв.
НИТХ дахь Монгол Ардын Намын бүлэг нийслэлийн хөгжлийн 2027 оны төлөвлөгөө болон ээлжит бус XIV хуралдаанаар хэлэлцэх бусад асуудлыг хэлэлцэн, холбогдох санал, байр сууриа нэгтгэж, маргааш /2026.09.18/ хуралдах НИТХ-ын ээлжит бус XIV хуралдаанаар хэлэлцүүлэхийг дэмжлээ.
