Английн хөлбөмбөгийн цэнгэлдэх хүрээлэнгийн үзэгчид тоглолт үзэж байхдаа шар айраг уух боломжтой болох эсэх асуудал дахин яригдаж эхэллээ. Их Британийн Ерөнхий сайд Энди Бёрнхэм хөлбөмбөгийн тоглолтын үеэр үзэгчдийг суудал дээрээ согтууруулах ундаа хэрэглэхийг хориглосон одоогийн хуулийг өөрчлөх боломжтой гэж мэдэгдсэн байна.
Бёрнхэм Нью-Йоркт НҮБ-ын Ерөнхий ассамблейн чуулганд оролцох үеэрээ хөлбөмбөгийн хөгжөөн дэмжигчдийг бусад спортын үзэгчдээс ялгаварлан хандах нь шударга бус гэж үзэж байгаагаа илэрхийлжээ. Тэрбээр регби, теннис, крикет зэрэг спортын тэмцээн үзэж буй хүмүүс талбайн ойролцоо согтууруулах ундаа хэрэглэж болдог байхад хөлбөмбөгийн фанатуудыг ижил боломжгүй болгосон нь зохисгүй гэж хэлсэн байна.
Англи, Уэльст хөлбөмбөгийн тоглолтын үеэр согтууруулах ундаа хэрэглэхийг хязгаарласан хууль 1985 онд батлагдсан. Тухайн үед хөлбөмбөгийн фанатуудын хүчирхийлэл, танхайралт их байсан бөгөөд архи согтууруулах ундаа нь эмх замбараагүй байдалд нөлөөлдөг хүчин зүйл гэж үзсэнтэй холбоотойгоор уг зохицуулалтыг хэрэгжүүлжээ.
Одоогийн журмаар Премьер лигээс эхлээд Английн хөлбөмбөгийн эхний таван шатны тэмцээнүүдийн цэнгэлдэхэд шар айраг болон бусад согтууруулах ундааг худалдаалах боломжтой. Гэхдээ үзэгчид талбай шууд харагдах хэсэгт, өөрөөр хэлбэл тоглолт үзэж буй суудалдаа уг ундааг уухыг хориглодог. Харин цэнгэлдэхийн талбай харагддаггүй тусгай хэсэгт хэрэглэх боломжтой.
Бёрнхэм энэ хуулийг “өөр эрин үеийн” зохицуулалт хэмээн тодорхойлж, өөрчлөлтийг туршилтын журмаар эхлүүлэх боломжтой гэж мэдэгджээ. Гэхдээ одоогоор Их Британийн Засгийн газар хуулийг өөрчлөх албан ёсны шийдвэр гаргаагүй байна.
Харин цагдаагийн байгууллагын зүгээс болгоомжтой хандаж байна. Их Британийн Хөлбөмбөгийн цагдаагийн нэгжийн мэдээлснээр хөлбөмбөгийн тоглолтын үеэр бусад спорттой харьцуулахад хүчирхийлэл болон гэмт хэргийн шинжтэй үйлдэл илүү гардаг тул архины хэрэглээг нэмэгдүүлэх нь үзэгчид, ажилтнуудын аюулгүй байдалд хүндрэл учруулж болзошгүй аж.
Харин Хөлбөмбөгийн хөгжөөн дэмжигчдийн холбоо 1985 оны хуулийг хуучирсан гэж үзэж, дахин хэлэлцэхийг дэмжжээ.
Эмэгтэйчүүдийн Английн Супер лигийн тэмцээнүүдэд шар айраг худалдаалах туршилт амжилттай хэрэгжиж байсан нь цаашид эрэгтэйчүүдийн тоглолтын үеэр ч ийм зохицуулалт хийх боломжтой эсэх талаарх хэлэлцүүлгийг улам идэвхжүүлж байна.
Л.Баяр
