Цар тахлыг дотооддоо хумихаар ажиллаж байгаа энэ үед улсын болоод нийслэлийн төсөв ихээхэн алдагдалтай яваа. 2020 оны эхний арван сарын байдлаар гурван хүн тутмын нэг нь ядууралд өртөж байсан бол одоо хоёр хүн тутмын нэг нь өртөж байна гэхэд хилсдэхгүй. 

Энэ цагт ирэх оны төсөвт тодотгол хийж, тэвчиж болох зардлуудыг танахыг эдийн засагчид сануулсаар байгаа.

НИТХ-ын өчигдрийн цахим хуралдаанаар 2021 оны төсвийг хэлэлцэх үеэр АН-ын бүлэг ч төсвөө танаж, данхайсан бүтцийг цөөлөх санал гаргасан байна. Тухайлбал, нийслэлийн харьяа байгууллагуудад онцын шаардлагагүй, ажил, үүрэг нь тодорхойгүй дэд захирал, дэд даргын тоог цөөлж, цомхотгосноор  их хэмжээний зардлыг хэмнэнэ хэмээн тооцжээ. Үүнд,

-Нийслэлийн Засаг даргын зургаан орлогчийг хоёр болгож цөөрүүлэх,

-Нийслэлийн харьяа 29 байгууллагын дэд захирал, дэд дарга болох 11 хүнийг цомхотгох,

-Нийслэлийн хэрэгжүүлэгч 34 байгууллагын 19 орлогч дарга, дэд захирлыг цомхотгон, цөөлөх,

-Нийслэлийн Захирагчийн ажлын албаны дэд захирал, дэд дарга зэрэг 11 хүнийг цомхотгох саналыг дэвшүүлсэн байна.