Одоогоос зургаан сарын өмнө Б.Эрдэнэчимэг гэх эмэгтэй хүүг нь хилсээр ялласан гэж үзэн Сүхбаатарын талбайд хөл нүцгэн эсэргүүцлээ илэрхийлсэн. Шүүхээс түүний хүүд 20 жилийн хорих ял он оноосон бөгөөд тэрбээр 2015 оноос хойш уг асуудлын хойноос хөөцөлдөж яваа юм. Тухайн үед Ерөнхий сайд Л.Оюун-Эрдэнийг төлөөлөн албаны хэсэг хүмүүс тухайн эмэгтэйтэй уулзаж нааштай шийдэхийг амласан ч  тусыг олоогүй байна. Тиймээс иргэн Б.Эрдэнэчимэг уг хэрэгтэй холбоотой асуудлаар дахин мэдээлэл хийлээ. 

Тэрбээр "Тухайн үед хэргийн газрын үзлэг хийсэн 46 хуудас материал алга болчихоод байна. Баянзүрх дүүргийн Н.Гэрэлмаа прокурор оо, хавтаст хэрэгт ороогүй материал хаачив, надад байгаа материалууд худлаа гэдгийг та нотлооч. Надад өгсөн баримтуудыг албаныхан өгсөн. Та бүгд ажлаа хийгээд өгөөч. Монгол Улсад үнэн гэж байна уу. 

Нотлох баримтыг нь гаргаж өгөөд байхад яагаад шийдэж чадахгүй, хариуцлага тооцохгүй байгаа юм бэ. 

Эрх мэдэлтэй хүмүүсийн өмнө жирийн иргэд үнэхээр сөгдөж байна. Шинжээч нь тухайн үед 25 кадр зураг авсан хэрнээ хэргийн материал дээр нэг ч зураг ороогүй. Анхдагч нотлох баримтыг устгаад 23.00 цагт зохиомол нотлох баримт үйлдсэн. Хүн амины хэрэг гарчихаад байхад гэм буруутай этгээдүүдийг зүгээр явуулчихсан. Яагаад хувцсыг нь устгаад, хэргийн газраас зүгээр явуулсан юм.

Хэргийн газраас явуулсан хүмүүсийн хумснаас амь хохирогчийн цус илэрсэн ч миний хүүгээс илрээгүй шүү дээ. 

Миний хүүг ялласан хутга зохиомол юм байна. Талийгаачийн нас барсан цаг нь зөрөөд байна гэдгийг би баримтаар гаргаж ирсэн. Дахиад ч баримт гаргаж ирнэ. Хүнд гүтгүүлээд түүнийгээ нотолж чадахгүй суух ямар аймшигтай гээч. Тиймээс би өдий хүртэл хүүгийнхээ төлөө цөхрөлтгүй тэмцэж байна" гэлээ.

А.Сүх