АНУ-ын Ерөнхийлөгч Дональд Трампын засаг захиргаа 2027 онд нийт 17,500 дүрвэгчийг АНУ-д хүлээн авахаар төлөвлөж байгаагаа Конгресст мэдэгджээ. Үүний дийлэнх нь Өмнөд Африкийн цагаан арьст иргэд, тэр дундаа африканер үндэстний хүмүүс байх юм.

Тэд өмнө нь 2026 оны санхүүгийн жилд дүрвэгч хүлээн авах дээд хязгаарыг 7,500 хүнээр тогтоож байсан бол энэ удаа уг тоог 17,500 болгон нэмэгдүүлэхээр болжээ. Гэхдээ шинэ хөтөлбөрийн хүрээнд Өмнөд Африкийн африканер иргэдэд онцгой анхаарал хандуулж байна. Трамп Өмнөд Африкийн цагаан арьст фермерүүд болон африканерчуудыг арьс өнгөөр ялгаварлан гадуурхалт, хүчирхийлэл, газар өмчтэй холбоотой дарамтад өртөж байна гэж удаа дараа мэдэгдэж ирсэн. Харин Өмнөд Африкийн засгийн газар эдгээр мэдэгдлийг эрс няцааж, цагаан арьст африканерчууд төрийн системтэй хавчлагад өртөж байгаа гэх мэдээлэл үндэслэлгүй гэж мэдэгддэг.

АНУ-ын дүрвэгч хүлээн авах тогтолцооны хувьд энэ шийдвэр онцгой анхаарал татаж байна. Учир нь Трампын засаг захиргаа бусад орны дүрвэгчдийг хүлээн авах үйл явцыг эрс хязгаарласан бөгөөд африканерчуудын хувьд тусгайлан хөтөлбөр хэрэгжүүлж байгаа юм.

АНУ-ын засгийн газрын албан хаагчид шинэ журмыг богино хугацаанд зохион байгуулах шаардлагатай болсон. Мөн зарим африканер иргэд АНУ руу явах хугацаагаа хойшлуулах хүсэлт гаргаж, орон байр, хүүхдийнхээ сургалт зэрэг хувийн асуудлаа шийдэх шаардлагатай болсон талаар эх сурвалжууд мэдээлжээ.

АНУ-ын засаг захиргаа энэ бодлогыг Өмнөд Африкт арьс өнгөөр ялгаварлан гадуурхах болон бусад хэлбэрийн шударга бус хавчлагад өртөж буй хүмүүсийг хамгаалах зорилготой гэж тайлбарлаж байна. Харин шүүмжлэгчид дүрвэгч хүлээн авах бодлогыг нэг тодорхой бүлэгт төвлөрүүлж байгаа нь АНУ-ын уламжлалт дүрвэгчийн тогтолцоонд өөрчлөлт оруулж байна гэж үзэж буй.

Л.Баяр