Коронавируст цар тахлын улмаас орон нутгийн зорчигч тээврийн галт тэрэгний хөдөлгөөнийг олон сараар зогсоосны эцэст УОК-ын зөвшөөрлөөр өнгөрсөн сарын 29-ний өдрөөс нээсэн.

Энэ хүрээнд Улаанбаатар-Сүхбаатар-Улаанбаатар, Улаанбаатар-Дархан-Эрдэнэт-Дархан-Улаанбаатар, Улаанбаатар-Чойр-Улаанбаатар гэсэн чиглэлд аялуулж эхэлсэн. Ингэхдээ зөвхөн нийтийн вагоноор халдвар хамгааллын дэглэмийг хатуу мөрдөн 50 хувийн дүүргэлттэй үйлчилж байсан бол УОК-ын шийдвэрээр өчигдрөөс тасалгаат вагоноор давхар үйлчилж эхэлжээ.

Тасалгаат вагоны нэг купенд хоёр хүн зорчих бөгөөд гэр бүлийн гишүүд хамт аялах тохиолдолд холбогдох бичиг баримтыг үндэслэн нэг купенд 4 хүртэлх хүн зорчиж болох аж. Орон нутгийн зорчигчийн галт тэргээр аялуулахдаа халдвар хамгааллын дэглэмийг баримтлахад онцгой анхаарч байгаа юм. Зорчигчдын ширээ, ариун цэврийн өрөө бүрт гар ариутгагч тавьж, галт тэрэгний үйлчлэгч нар зорчигч бүрийн халууныг хэмжиж, аяллын турш хоорондын зайг баримтлуулахад анхааран ажиллаж байгаа аж.

Зорчигчдыг бууж, суух бүрт ариутгал, цэвэрлэгээ хийж, үндсэн өртөөнд ирж,  явах бүрт мэргэжлийн байгууллагаар ариутгал хийлгэж байгаа юм байна.